വാഷിംഗ്ടൺ: ചൊവ്വയുടെ ഉപരിതലത്തിൽ പര്യവേക്ഷണം നടത്തുന്ന നാസയുടെ റോവർ ശേഖരിച്ച വിവരങ്ങൾ വിശകലനം ചെയ്തപ്പോൾ നാസയിലെ ശാസ്ത്രജ്ഞർ കൗതുകകരമായ ഒരു നിരീക്ഷണം നടത്തി. ചൊവ്വയിലെ പാറകളിലുള്ള ധാതു ലവണ നിക്ഷേപങ്ങളോട് വലിയ സാമ്യമുള്ളവയാണ് തുർക്കിയിലെ സാൾദാ തടാകത്തിന്റെ അടിത്തട്ടിലുള്ളത് എന്നതാണ് ആ നിരീക്ഷണം. തെക്കുപടിഞ്ഞാറൻ തുർക്കിയിലെ ആഴമേറിയ തടാകമാണ് സാൾദ. ചൊവ്വയിൽ നാസയുടെ ബഹിരാകാശവാഹനം ഇറങ്ങിയ പ്രദേശം ജെസെറോ എന്നു പേരിട്ട ഒരു ഗർത്തത്തിനരികിലാണ്. ഈ ഭാഗങ്ങൾ ഒരിക്കൽ വെള്ളത്തിൽ മുങ്ങിക്കിടന്നതാകാൻ ഇടയുണ്ടെന്നാണ് ശാസ്ത്രജ്ഞർ കരുതുന്നത്.
ചൊവ്വയിലെ ജെസെറോ ഗർത്തത്തിലെ ജീവ സാധ്യതകൾ പഠിക്കാൻ സാൾദ തടാകത്തിൽ നിന്ന് ശേഖരിച്ച വിവരങ്ങളും ഈ ഡെൽറ്റയ്ക്ക് ചുറ്റും നിക്ഷേപിക്കപ്പെട്ടിട്ടുണ്ടെന്ന് കരുതപ്പെടുന്ന അവശിഷ്ടങ്ങളിൽ സൂക്ഷിച്ചിരിക്കുന്ന സൂക്ഷ്മജീവികളുടെ ഫോസിലുകളുടെ വിവരങ്ങളും പരിശോധനയ്ക്ക് വിധേയമാക്കുകയാണ് ഗവേഷകർ. “സൽദാ … നമുക്ക് പഠിക്കാനും ചോദ്യം ചെയ്യാനും കഴിയുന്ന ശക്തമായ അനലോഗ് ആയി വർത്തിക്കും,” നാസ സയൻസ് അസോസിയേറ്റ് അഡ്മിനിസ്ട്രേറ്റർ തോമസ് സുർബുചെൻ റോയിട്ടേഴ്സിനോട് പറഞ്ഞു.
അമേരിക്കൻ, ടർക്കിഷ് ശാസ്ത്രജ്ഞരുടെ ഒരു സംഘം 2019 ൽ തടാകത്തിന്റെ തീരപ്രദേശങ്ങളിൽ ഗവേഷണം നടത്തിയിരുന്നു. മറ്റൊരു ലോകത്തേക്ക് ഇതുവരെ പറന്നതിൽ വച്ച് ഏറ്റവും നൂതനമായ ജ്യോതിർജീവശാസ്ത്ര ലാബായ പെർസെവെറൻസ് റോവറിന് പിന്നിലുള്ള ഗവേഷക സംഘം ജെസെറോ ഗർത്തത്തിൽ മൈക്രോബയലൈറ്റുകൾ ഉണ്ടാകാനിടയുണ്ടോ എന്ന് പരിശോധിക്കുകയാണ്. ജീവന്റെ പ്രധാന ഘടകമായ കാർബൺ ഡൈ ഓക്സൈഡിൽ നിന്നും വെള്ളത്തിൽ നിന്നും രൂപംകൊണ്ട കാർബണേറ്റ് ധാതുക്കളുമായി സാൾദയിൽ നിന്നുള്ള അവശിഷ്ടങ്ങളെ അവർ താരതമ്യം ചെയ്യും.
