കാഞ്ഞങ്ങാട്: കാഞ്ഞങ്ങാട് നെഹ്‌റു കോളേജിന്റെ ടെറസിൽ പ്രതിദിനം 400 യൂണിറ്റ് വൈദ്യുതി ഉത്പാദിപ്പിക്കാൻ ശേഷിയുള്ള സൗരോർജ പ്ലാന്റ് സ്ഥാപിക്കാൻ ധാരണയായി. കെ എസ് ഇ ബിയും കോളേജ് മാനേജ്‌മെന്റും ഇതുസംബന്ധിച്ചുള്ള ധാരണാപത്രത്തിൽ ഒപ്പുവെച്ചു. കെട്ടിടങ്ങളുടെ ടെറസ്സിനുമുകളിൽ സോളാർപ്ലാന്റ് സ്ഥാപിക്കുന്ന കെ എസ് ഇ ബിയുടെ സംരംഭമായ ‘സൗര’ യിൽ ഉൾപ്പെടുത്തിയാണ് പദ്ധതി പ്രാവർത്തികമാക്കുന്നത്.
രണ്ടാഴ്ചയ്ക്കുള്ളിൽ പണിതുടങ്ങി ഡിസംബറിൽ കമ്മിഷൻ ചെയ്യാനാണ് തീരുമാനം. നൂറ് കിലോവാട്ട് ശേഷിയുള്ള സൗരോർജ പ്ലാന്റാണ് സ്ഥാപിക്കുന്നത്. 60 ലക്ഷം രൂപയാണ് പദ്ധതിച്ചെലവ് പ്രതീക്ഷിക്കുന്നത്. മുഴുവൻ തുകയും കെ എസ് ഇ ബി വഹിക്കും. ഉത്പാദിപ്പിക്കപ്പെടുന്ന വൈദ്യുതി കെ എസ് ഇ ബി യുടെ പവർഗ്രിഡിലേക്ക് മാറ്റും. ഒരുദിവസം ലഭ്യമാകുന്ന 400 യൂണിറ്റിൽ പത്തു ശതമാനം നെഹ്‌റു കോളേജിന് സൗജന്യമായി നൽകും. ബാക്കി 360 യൂണിറ്റ് ജില്ലയുടെ വൈദ്യുതി വിതരണത്തിലേക്ക്‌ മാറ്റും. 25 വർഷമാണ് കരാർ. ഇതിന്റെ പാതിവർഷംകൊണ്ട് ഉത്പാദനത്തിനായി മുടക്കുന്ന പണം തിരിച്ചു കിട്ടുമെന്നാണ് കെ എസ് ഇ ബി അധികൃതർ പറയുന്നത് .
