ന്യൂഡല്ഹി: ബാബ്റി മസ്ജിദ് തകര്ത്ത കേസില് 30-09-2020 ബുധനാഴ്ച പ്രത്യേക കോടതി വിധി പറയും. മുതിര്ന്ന ബി.ജെ.പി നേതാക്കളായ എല്.കെ അദ്വാനി, മുരളി മനോഹര് ജോഷി തുടങ്ങിയവരാണ് കേസിലെ പ്രതികള്. ബാബ്റി മസ്ജിദ് തകര്ക്കപ്പെട്ടിട്ട് 28 വര്ഷങ്ങള്ക്ക് ശേഷമാണ് കേസില് വിധി പ്രസ്താവിക്കാന് പോകുന്നത്. ലഖ്നൗവിലെ പ്രത്യേക കോടതിയാണ് വിധി പ്രഖ്യാപിക്കുക.
സെപ്റ്റംബര് 30 നുള്ളില് കേസില് വാദം കേട്ട് വിധി പ്രഖ്യാപിക്കണമെന്ന് സുപ്രീംകോടതി നിര്ദ്ദേശിച്ചിരുന്നു. ഗൂഢാലോചനക്കേസും ബാബറി മസ്ജിദ് തകര്ത്തതുമായി ബന്ധപ്പെട്ട എല്ലാ കേസുകളും ഒരുമിച്ച് വിചാരണ നടത്തണമെന്ന് സുപ്രീംകോടതി നേരത്തെ ഉത്തരവിട്ടിരുന്നു. ഇതേ തുടര്ന്ന് ഒരുമിച്ചായിരുന്നു വിചാരണ നടന്നത്.
ബാബ്റി മസ്ജിദ് തകര്ത്തതിന് പിന്നിലെ ഗൂഢാലോചനയില് പങ്കില്ലെന്നും രാഷ്ട്രീയപകപോക്കലിനായി കേസിലേക്ക് വലിച്ചിഴച്ചതാണെന്നും എല് കെ അദ്വാനി കോടതിക്ക് മുമ്പാകെ മൊഴി നല്കിയിരുന്നു. മുരളി മനോഹര് ജോഷിയും വിചാരണയില് കുറ്റം നിഷേധിച്ചിരുന്നു.
