ജമ്മു, ജൂലൈ 16-

ജമ്മു സർവകലാശാലയിലെ എല്ലാ വകുപ്പുകളിൽ നിന്നും ലൈബ്രറികളിൽ നിന്നും നിരോധിത പുസ്തകങ്ങൾ അടിയന്തരമായി പിൻവലിക്കാൻ സർവകലാശാല അധികൃതർ ഉത്തരവിട്ടു. ജമ്മു-കശ്മീർ ഭരണകൂടം കരിമ്പട്ടികയിൽ ഉൾപ്പെടുത്തിയ മൂന്ന് എഴുത്തുകാരുടെയും രണ്ട് പ്രസാധകരുടെയും പുസ്തകങ്ങൾ ഇനി വാങ്ങരുതെന്നും നിലവിലുള്ളവ ഉടൻ മാറ്റണമെന്നുമാണ് നിർദേശം. സർവകലാശാലയിലെ എല്ലാ വിഭാഗങ്ങളിലും ലൈബ്രറികളിലും ഇത്തരം പുസ്തകങ്ങൾ ഇല്ലെന്ന് ഉറപ്പാക്കാൻ പ്രത്യേക പരിശോധനയും നടത്തും.

വകുപ്പുകൾക്ക് അടിയന്തര നിർദേശം

ജമ്മു-കശ്മീർ സർക്കാരിന്റെ കടുത്ത നടപടികളുടെ തുടർച്ചയായാണ് സർവകലാശാലയുടെ ഈ നീക്കം. ഹിലാൽ അഹമ്മദ്, സന്തോഷ് മീണ, ഡോ. സുശാന്ത് ഗിരി എന്നിവരുടെ പുസ്തകങ്ങൾ ഉപയോഗിക്കരുതെന്നും ഒബറോയ് ബുക്ക് സർവീസ്, അനുരാഗ് പ്രസാധൻ എന്നീ പ്രസാധകരിൽ നിന്ന് ഇനി പുസ്തകങ്ങൾ വാങ്ങരുതെന്നും സർക്കുലറിൽ വ്യക്തമാക്കുന്നു. അച്ചടി പതിപ്പുകൾ മാത്രമല്ല, ഡിജിറ്റൽ ശേഖരത്തിലുള്ളവയും നീക്കം ചെയ്യണമെന്നാണ് നിർദേശം.

വിവാദത്തിന് പിന്നിൽ

സർക്കാർ സ്കൂൾ ലൈബ്രറികളിലേക്ക് വിതരണം ചെയ്ത രണ്ട് പുസ്തകങ്ങളിൽ വിഘടനവാദത്തെയും ഇന്ത്യാവിരുദ്ധ ആശയങ്ങളെയും മഹത്വവത്കരിക്കുന്ന ഉള്ളടക്കമുണ്ടെന്ന കണ്ടെത്തലാണ് വിവാദത്തിന് വഴിവെച്ചത്. ഇതേ തുടർന്നാണ് ജമ്മു-കശ്മീർ സർക്കാർ ഈ പുസ്തകങ്ങൾ പിൻവലിക്കുകയും ബന്ധപ്പെട്ട എഴുത്തുകാരെയും പ്രസാധകരെയും കരിമ്പട്ടികയിൽ പെടുത്തുകയും ചെയ്തത്.

അന്വേഷണവും അറസ്റ്റും

പുസ്തക വിവാദവുമായി ബന്ധപ്പെട്ട് മൂന്ന് പ്രസാധകരെ ജമ്മു-കശ്മീർ പൊലീസ് ഇതിനകം അറസ്റ്റ് ചെയ്തിട്ടുണ്ട്. കേസിൽ അന്വേഷണം പുരോഗമിക്കുകയാണ്. നേരത്തെ സ്കൂൾ വിദ്യാഭ്യാസ വകുപ്പിലെ എട്ട് ഉദ്യോഗസ്ഥരെ സസ്‌പെൻഡ് ചെയ്യുകയും സംഭവത്തിൽ ഉന്നതതല അന്വേഷണത്തിന് ഉത്തരവിടുകയും ചെയ്തിരുന്നു.

പരിശോധന കർശനമാക്കും

ഇനിമുതൽ സർവകലാശാലയിലെ വകുപ്പുതല ഉപദേശക സമിതികൾ എല്ലാ പുസ്തകങ്ങളും കർശനമായി പരിശോധിക്കണമെന്ന് അധികൃതർ നിർദേശിച്ചിട്ടുണ്ട്. രാജ്യവിരുദ്ധമോ വിഘടനവാദപരമോ, മറ്റ് തരത്തിൽ എതിർപ്പുയരാൻ സാധ്യതയുള്ളതോ ആയ ഉള്ളടക്കം പുസ്തകങ്ങളിൽ ഇല്ലെന്ന് ഉറപ്പാക്കാനാണ് ഈ നീക്കം.