ന്യൂഡൽഹി, 2026 ജൂലൈ 16

രാജ്യത്തെ ഔഷധസസ്യ മേഖലയിൽ ഗവേഷണവും പുതുമകളും ശക്തമാക്കാൻ ആയുഷ് മന്ത്രാലയവും ഡൽഹി സർവകലാശാലയും ധാരണാപത്രം ഒപ്പുവച്ചു. ദേശീയ ഔഷധസസ്യ ബോർഡും ഡൽഹി സർവകലാശാലയ്ക്ക് കീഴിലുള്ള ഭാസ്‌കരാചാര്യ കോളേജ് ഓഫ് അപ്ലൈഡ് സയൻസസുമാണ് കരാറിലെ പങ്കാളികൾ. ജൂലൈ 15ന് ന്യൂഡൽഹിയിലെ കർത്തവ്യ ഭവനിലായിരുന്നു ധാരണാപത്രം ഒപ്പിട്ടത്.

ലക്ഷ്യം മൂല്യവർധിത ഉൽപ്പന്നങ്ങൾ

കേന്ദ്ര ആയുഷ് സഹമന്ത്രി പ്രതാപ്‌റാവു ജാധവിന്റെ സാന്നിധ്യത്തിലാണ് കരാർ ഒപ്പുവച്ചത്. ഔഷധസസ്യങ്ങളിൽനിന്ന് പുതിയ ഉൽപ്പന്നങ്ങൾ വികസിപ്പിക്കുക, വിളവെടുപ്പിനുശേഷമുള്ള സംസ്കരണം മെച്ചപ്പെടുത്തുക, പരിസ്ഥിതിസൗഹൃദ പാക്കേജുകൾ  തയ്യാറാക്കുക, സാങ്കേതികവിദ്യ കൈമാറുക എന്നിവയാണ് പ്രധാന ലക്ഷ്യങ്ങൾ. പരമ്പരാഗത അറിവിനെ ആധുനിക ശാസ്ത്രവുമായി ചേർത്ത് ഔഷധസസ്യങ്ങളുടെ വിപണിമൂല്യം ഉയർത്താനാണ് ശ്രമം.

കർഷകർക്കും യുവാക്കൾക്കും അവസരം

ഔഷധസസ്യ കൃഷിയിലൂടെ കർഷകരുടെ വരുമാനം ഉയർത്താനും യുവ ഗവേഷകർക്കും സംരംഭകർക്കും പുതിയ അവസരങ്ങൾ നൽകാനും കൂട്ടുകെട്ട് സഹായിക്കുമെന്ന് സർക്കാർ പ്രതീക്ഷിക്കുന്നു. ഭക്ഷ്യസാങ്കേതികവിദ്യ, പോഷക ഉൽപ്പന്നങ്ങൾ, സംസ്കരണം, സുസ്ഥിര പൊതിയൽ എന്നിവയിലെ കോളേജിന്റെ വൈദഗ്ധ്യം പദ്ധതിക്ക് ഉപയോഗിക്കും. വ്യവസായവും വിദ്യാഭ്യാസ സ്ഥാപനങ്ങളും തമ്മിലുള്ള സഹകരണം ശക്തമാക്കി പുതിയ സാങ്കേതികവിദ്യകൾ വിപണിയിലെത്തിക്കാനും പദ്ധതി വഴിയൊരുക്കും.

പ്രകൃതിസൗഹൃദ പാക്കേജുകൾക്ക് പ്രാധാന്യം

അലുമിനിയം ഉൾപ്പെടെയുള്ള പരിസ്ഥിതിക്ക് ദോഷകരമായ പാക്കേജുകൾക്ക്  പകരം ഔഷധസസ്യങ്ങളിൽനിന്ന് ആരോഗ്യസുരക്ഷയുള്ള പാക്കേജുകൾ വികസിപ്പിക്കാനാണ് ആലോചന. നദീതീരങ്ങൾ ഉൾപ്പെടെയുള്ള അനുയോജ്യ പ്രദേശങ്ങളിൽ ഔഷധസസ്യ കൃഷി വ്യാപിപ്പിക്കുന്നത് ജൈവവൈവിധ്യ സംരക്ഷണത്തിനും ഗ്രാമീണ തൊഴിലവസരങ്ങൾക്കും സഹായിക്കുമെന്നും ദേശീയ ഔഷധസസ്യ ബോർഡ് വ്യക്തമാക്കി.