തിരുവനന്തപുരം, 2026 ജൂൺ 27 –

വീര്യം കുറഞ്ഞ മദ്യത്തിന്റെ നികുതി കുറയ്ക്കുന്ന വ്യവസ്ഥ ഉൾപ്പെടുത്തി സംസ്ഥാന സർക്കാർ ധനബില്ലിന്റെ കരട് പ്രസിദ്ധീകരിച്ചു. ബിൽ ജൂലൈ ഒന്നിന് നിയമസഭയിൽ അവതരിപ്പിക്കും. ബിൽ പാസായാലും വീര്യം കുറഞ്ഞ മദ്യം വിൽക്കാൻ ഉടൻ അനുമതി നൽകില്ലെന്നാണ് സർക്കാരിന്റെ വിശദീകരണം.

പുതിയ ഇനം മദ്യം വിപണിയിലെത്തിക്കാൻ എക്സൈസ് വകുപ്പിന്റെ അനുമതി നിർബന്ധമാണെന്ന് സർക്കാർ അറിയിച്ചു. വിഷയത്തിൽ കൂടുതൽ ചർച്ചകൾ നടത്താനായി മുഖ്യമന്ത്രി ഘടകകക്ഷികളുമായി ആശയവിനിമയം നടത്തും. മുസ്ലിം ലീഗ് ഉൾപ്പെടെയുള്ള ഘടകകക്ഷികൾ എതിർപ്പ് അറിയിച്ചതോടെയാണ് സർക്കാർ കൂടുതൽ ചർച്ചകളിലേക്ക് നീങ്ങുന്നത്.

നികുതി ഘടനയിൽ ഉടൻ മാറ്റം വരുത്തേണ്ടെന്ന അഭിപ്രായമാണ് നിലവിൽ മുഖ്യമന്ത്രിക്കുള്ളത്. അതേസമയം, എതിർപ്പ് ഉയർത്തിയിരുന്ന എക്സൈസ് മന്ത്രി ഉൾപ്പെടെയുള്ള കോൺഗ്രസ് നേതാക്കൾ വിവാദം അവസാനിപ്പിച്ചുവെന്നാണ് നിലപാട്. ഇതിനിടെ, വീര്യം കുറഞ്ഞ മദ്യത്തിന്റെ നികുതി ഇളവ് പിൻവലിക്കണമെന്നും ധനബില്ലിൽ ഈ വ്യവസ്ഥ ഒഴിവാക്കണമെന്നും മുതിർന്ന കോൺഗ്രസ് നേതാവും കെ.പി.സി.സി മുൻ അധ്യക്ഷനുമായ വി. എം. സുധീരൻ തുടർച്ചയായി ആവശ്യപ്പെടുന്നുണ്ട്.