ന്യൂഡൽഹി, 2026 ജൂൺ 26
ഭക്ഷ്യ വ്യാപാര സ്ഥാപനങ്ങളുടെ ലൈസൻസും രജിസ്ട്രേഷനുമായി ബന്ധപ്പെട്ട ചട്ടങ്ങളിൽ കേന്ദ്രസർക്കാർ ഭേദഗതി വിജ്ഞാപനം പുറത്തിറക്കി. ഭക്ഷ്യസുരക്ഷ ഉറപ്പാക്കാൻ നിർണായകമായ സ്റ്റോക്ക് രേഖകളും പഴയ സ്റ്റോക്ക് ആദ്യം ഉപയോഗിക്കുന്ന രീതിയും ഇനി മുതൽ ഭക്ഷ്യ നിർമാണ സ്ഥാപനങ്ങൾക്ക് മാത്രം നിർബന്ധമാകും. ജൂൺ 26-നാണ് ഈ ഭേദഗതി വിജ്ഞാപനം പുറത്തിറക്കിയത്.
നിലവിലെ ചട്ടപ്രകാരം ലൈസൻസുള്ള എല്ലാ ഭക്ഷ്യ വ്യാപാര സ്ഥാപനങ്ങളും സ്റ്റോക്ക് രേഖകൾ സൂക്ഷിക്കുകയും സ്റ്റോക്ക് ക്രമത്തിൽ ഉപയോഗിക്കുകയും ചെയ്യേണ്ടതായിരുന്നു. പുതിയ ഭേദഗതിയോടെ ചില്ലറ വ്യാപാരികളും സമാനമായ നിർമാണേതര സ്ഥാപനങ്ങളും ഈ നിർബന്ധത്തിൽ നിന്ന് ഒഴിവാകും. ചെറുകിട, ഇടത്തരം സ്ഥാപനങ്ങളുടെ ചട്ടപാലന ഭാരം കുറയ്ക്കുന്നതിനൊപ്പം ആവശ്യമായ മേഖലകളിൽ ഭക്ഷ്യസുരക്ഷയും ഉൽപ്പന്നങ്ങളുടെ തിരിച്ചറിയൽ സംവിധാനവും തുടരുമെന്നാണ് സർക്കാർ വ്യക്തമാക്കുന്നത്.
വ്യാപാരം കൂടുതൽ എളുപ്പമാക്കുകയും അപകടസാധ്യത അടിസ്ഥാനമാക്കിയുള്ള നിയന്ത്രണ സംവിധാനം ശക്തിപ്പെടുത്തുകയും ചെയ്യുന്നതിന്റെ ഭാഗമായാണ് ഈ പരിഷ്കാരമെന്ന് സർക്കാർ അറിയിച്ചു. സ്ഥിരകാല ലൈസൻസ്, വിറ്റുവരവ് പരിധിയിലെ മാറ്റം, തെരുവ് ഭക്ഷ്യ വ്യാപാരികൾക്കുള്ള ഇരട്ട ചട്ടപാലനം ഒഴിവാക്കൽ, അപകടസാധ്യത അടിസ്ഥാനമാക്കിയുള്ള പരിശോധന സംവിധാനം എന്നിവയും കഴിഞ്ഞ വർഷങ്ങളിൽ നടപ്പാക്കിയിരുന്നു. സംസ്ഥാനങ്ങൾ, കേന്ദ്രഭരണ പ്രദേശങ്ങൾ, വിവിധ മേഖലകളിലെ പങ്കാളികൾ എന്നിവരുമായി നടത്തിയ വ്യാപക ചർച്ചകൾക്കുശേഷമാണ് പുതിയ ഭേദഗതികൾക്ക് അന്തിമരൂപം നൽകിയതെന്നും സർക്കാർ അറിയിച്ചു.
