ബെംഗളൂരു, 2026 ജൂൺ 25
ബ്രിക്സ് രാജ്യങ്ങൾ ചേർന്ന് ശക്തമായ ബഹിരാകാശ സമ്പദ്വ്യവസ്ഥ കെട്ടിപ്പടുക്കണമെന്ന് കേന്ദ്രമന്ത്രി ഡോ. ജിതേന്ദ്ര സിങ് ആഹ്വാനം ചെയ്തു. ബെംഗളൂരുവിൽ നടന്ന ബ്രിക്സ് ബഹിരാകാശ ഏജൻസികളുടെ മേധാവിമാരുടെ യോഗത്തിന്റെ സമാപന സമ്മേളനത്തിലായിരുന്നു അദ്ദേഹത്തിന്റെ പ്രസംഗം. ബഹിരാകാശ രംഗത്തെ നവീകരണം, നിക്ഷേപം, സംരംഭകത്വം, സുസ്ഥിര വികസനം എന്നിവയ്ക്ക് അംഗരാജ്യങ്ങൾ ഒരുമിച്ച് പ്രവർത്തിക്കണമെന്ന് അദ്ദേഹം ആവശ്യപ്പെട്ടു. ഒറ്റപ്പെട്ട പ്രവർത്തനങ്ങളല്ല, പങ്കാളിത്തവും സംയുക്ത നവീകരണവുമാണ് ഭാവിയിലെ ബഹിരാകാശ സമ്പദ്വ്യവസ്ഥയെ മുന്നോട്ട് നയിക്കുകയെന്നും അദ്ദേഹം പറഞ്ഞു.
ഇന്ത്യയുടെ അധ്യക്ഷതയിൽ ഇന്ത്യൻ ബഹിരാകാശ ഗവേഷണ സ്ഥാപനം സംഘടിപ്പിച്ച രണ്ടുദിവസത്തെ യോഗത്തിൽ ബ്രസീൽ, ചൈന, ഈജിപ്ത്, എത്യോപ്യ, ഇൻഡോനേഷ്യ, ഇറാൻ, റഷ്യ, ദക്ഷിണാഫ്രിക്ക, ഐക്യ അറബ് എമിറേറ്റ്സ് എന്നീ രാജ്യങ്ങളിലെ പ്രതിനിധികളും പങ്കെടുത്തു. ബഹിരാകാശ സുസ്ഥിരത, അവശിഷ്ടങ്ങളില്ലാത്ത ദൗത്യങ്ങൾ, വിദൂര സംവേദന ഉപഗ്രഹ ശൃംഖല ശക്തിപ്പെടുത്തൽ, പുതിയ അംഗരാജ്യങ്ങളുടെ പങ്കാളിത്തം, നിർദിഷ്ട ബ്രിക്സ് ബഹിരാകാശ കൗൺസിൽ എന്നിവ ചർച്ചയായി. ദുരന്തനിവാരണം, ഭൂനിരീക്ഷണം, ശേഷി വികസനം, അറിവ് പങ്കിടൽ തുടങ്ങിയ മേഖലകളിലെ സഹകരണവും യോഗം പരിഗണിച്ചു. ചടങ്ങിൽ ഇന്ത്യൻ ബഹിരാകാശ വ്യവസായ വിവരപുസ്തകവും പ്രകാശനം ചെയ്തു.
സമ്പർക്കം, ദിശാനിർണയം, ദുരന്തസന്നദ്ധത, കൃഷി, ആരോഗ്യം, വിദ്യാഭ്യാസം, പരിസ്ഥിതി നിരീക്ഷണം തുടങ്ങി നിരവധി മേഖലകളിൽ ബഹിരാകാശ സാങ്കേതികവിദ്യ വലിയ മാറ്റം സൃഷ്ടിക്കുന്നുവെന്ന് ഡോ. ജിതേന്ദ്ര സിങ് പറഞ്ഞു. കാലാവസ്ഥാ വ്യതിയാനം, പ്രകൃതിദുരന്തങ്ങൾ, ഭക്ഷ്യ-ജല സുരക്ഷ, പരിസ്ഥിതി നാശം തുടങ്ങിയ ആഗോള വെല്ലുവിളികൾക്ക് കൂട്ടായ പരിഹാരങ്ങൾ അനിവാര്യമാണെന്നും അദ്ദേഹം വ്യക്തമാക്കി. ഇന്ത്യയുടെ ബഹിരാകാശ മേഖലയിൽ നടപ്പാക്കിയ മാറ്റങ്ങൾ സ്വകാര്യ മേഖലക്കും പുതുസംരംഭങ്ങൾക്കും കൂടുതൽ അവസരങ്ങൾ തുറന്നതായും അദ്ദേഹം പറഞ്ഞു. ചന്ദ്രയാൻ-മൂന്ന്, ആദിത്യ-ഒന്ന്, ഗഗൻയാൻ ദൗത്യത്തിന്റെ പുരോഗതി എന്നിവ അന്താരാഷ്ട്ര സഹകരണത്തിന് പുതിയ വഴികൾ തുറന്നതായും അദ്ദേഹം കൂട്ടിച്ചേർത്തു. കൂടിയാലോചനയിൽ നിന്ന് സംയുക്ത വികസനത്തിലേക്കും സംയുക്ത നവീകരണത്തിലേക്കും ബ്രിക്സ് സഹകരണം വളരണമെന്നാണ് ഇന്ത്യയുടെ ലക്ഷ്യമെന്നും അദ്ദേഹം വ്യക്തമാക്കി.
