പുൽപ്പള്ളി, 2026 ജൂൺ 24 –
പാളക്കൊല്ലി-ചേക്കാടി റോഡ് വീതികൂട്ടി പൂർണമായി ടാർ ചെയ്യണമെന്ന് ആവശ്യപ്പെട്ട് പ്രദേശവാസികൾ രംഗത്ത്. റോഡ് റീടാർ ചെയ്യുന്നതിനായി ത്രിതല പഞ്ചായത്ത് നേതൃത്വത്തിൽ 75 ലക്ഷം രൂപ അനുവദിച്ചിട്ടുണ്ടെങ്കിലും നിലവിലെ പദ്ധതി പ്രകാരം റോഡ് പൂർണമായി നവീകരിക്കാൻ കഴിയില്ലെന്നാണ് നാട്ടുകാരുടെ പരാതി. അഞ്ച് കിലോമീറ്ററോളം ദൂരമുള്ള റോഡിന്റെ ഭൂരിഭാഗവും വനമേഖലയിലൂടെയാണ് കടന്നുപോകുന്നത്.
വനത്തിലൂടെയുള്ള ഭാഗങ്ങളിൽ റോഡിന് വീതി കുറവായതിനാൽ എതിർദിശയിൽ വരുന്ന വാഹനങ്ങൾക്ക് സൈഡ് നൽകാൻ പോലും ബുദ്ധിമുട്ടാണെന്ന് നാട്ടുകാർ പറയുന്നു. റോഡ് വികസനത്തിനായി കഴിഞ്ഞ വർഷം വനംവകുപ്പ് റോഡരികിലെ മരങ്ങൾ മുറിച്ചുമാറ്റിയിരുന്നെങ്കിലും പുതിയ ടാറിങ് പദ്ധതിയിൽ റോഡ് വീതികൂട്ടുന്നതിനുള്ള മതിയായ എസ്റ്റിമേറ്റ് ഉൾപ്പെടുത്തിയിട്ടില്ലെന്നാണ് ആക്ഷേപം.
കെഎസ്ആർടിസി ഉൾപ്പെടെ മൂന്ന് ബസുകൾ സർവീസ് നടത്തുന്ന പ്രധാന റോഡാണിത്. പുൽപ്പള്ളി, മുള്ളൻകൊല്ലി, പൂതാടി പഞ്ചായത്തുകളിലെ ജനങ്ങൾ മൈസൂരു, കുടക്, ഷിമോഗ തുടങ്ങിയ കർണാടക പ്രദേശങ്ങളിലേക്ക് യാത്ര ചെയ്യാൻ പ്രധാനമായും ഈ റോഡിനെയാണ് ആശ്രയിക്കുന്നത്. ചേക്കാടി പാലം യാഥാർഥ്യമായതോടെ വാഹനഗതാഗതം വർധിച്ചിട്ടും റോഡിന്റെ വികസനത്തിൽ വേണ്ടത്ര ശ്രദ്ധ ലഭിക്കുന്നില്ലെന്നാണ് പരാതി. റോഡ് പൊതുമരാമത്ത് വകുപ്പ് ഏറ്റെടുത്ത് വീതികൂട്ടി ലെവലൈസ് ചെയ്ത് ടാർ ചെയ്യാൻ അടിയന്തര നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു.
