കൽക്കരി സമ്പത്തിന്റെ സാമ്പത്തിക മൂല്യം കണക്കാക്കാൻ ചർച്ചാപത്രം പുറത്തിറക്കി

ന്യൂഡൽഹി, 2026 ജൂൺ 24

ഇന്ത്യയിലെ കൽക്കരി വിഭവങ്ങളുടെ സാമ്പത്തിക മൂല്യം കണക്കാക്കുന്നതിനുള്ള രീതിശാസ്ത്രത്തെ കുറിച്ചുള്ള ചർച്ചാപത്രം സ്ഥിതിവിവരക്കണക്ക്-പരിപാടി നിർവഹണ മന്ത്രാലയം പുറത്തിറക്കി. പരിസ്ഥിതി-സാമ്പത്തിക അക്കൗണ്ടിങ് സംവിധാനവുമായി പൊരുത്തപ്പെടുന്ന രീതിയിലാണ് ഈ രേഖ തയ്യാറാക്കിയിരിക്കുന്നത്. 2015-16 മുതൽ 2023-24 വരെയുള്ള കാലയളവിലെ കൽക്കരിയുടെ ഭൗതിക ആസ്തി കണക്കുകളും ഇതിൽ ഉൾപ്പെടുത്തിയിട്ടുണ്ട്.

മന്ത്രാലയമാണ് ചർച്ചാപത്രം പുറത്തിറക്കിയത്. രാജ്യത്തിന്റെ പ്രകൃതി വിഭവ സമ്പത്തിന്റെ സാമ്പത്തിക മൂല്യം മനസിലാക്കുക, വിഭവശോഷണത്തിന്റെ ചെലവ് വിലയിരുത്തുക, ഭാവിയിലെ സർക്കാർ വരുമാനം കണക്കാക്കുക, വിവിധ പരിസ്ഥിതി ആസ്തികളെ താരതമ്യം ചെയ്യുക എന്നിവ ലക്ഷ്യമിട്ടാണ് നടപടി. രാജ്യത്തിന്റെ സമ്പദ്‌വ്യവസ്ഥയിലും വൈദ്യുതി ഉൽപ്പാദനത്തിലും കൽക്കരിക്കുള്ള പ്രധാന്യം കണക്കിലെടുത്താണ് കൽക്കരിയെ മാതൃകാ പഠനവിഷയമായി തെരഞ്ഞെടുത്തത്. മൂന്ന് അന്താരാഷ്ട്ര രീതികൾ പരിശോധിച്ച ശേഷം സാമ്പത്തിക സഹകരണ-വികസന സംഘടനയുടെ രീതിയാണ് ഇന്ത്യൻ സാഹചര്യത്തിന് ഏറ്റവും അനുയോജ്യമെന്ന് കണ്ടെത്തിയതെന്നും രേഖ വ്യക്തമാക്കുന്നു.

2018 മുതൽ മന്ത്രാലയം കൽക്കരിയും മറ്റ് ധാതു-ഊർജ വിഭവങ്ങളുമായി ബന്ധപ്പെട്ട ഭൗതിക ആസ്തി കണക്കുകൾ തയ്യാറാക്കി വരികയാണ്. അതിന്റെ തുടർച്ചയായാണ് ഇപ്പോൾ സാമ്പത്തിക മൂല്യനിർണയത്തിലേക്കും കടന്നത്. 2024-25ൽ രാജ്യത്ത് റെക്കോർഡ് കൽക്കരി ഉൽപ്പാദനവും ലിഗ്നൈറ്റ് ഉൽപ്പാദനവും രേഖപ്പെടുത്തിയിരുന്നു. പുനരുപയോഗിക്കാൻ കഴിയാത്ത വിഭവമായതിനാൽ കൽക്കരിയുടെ സുസ്ഥിര പരിപാലനത്തിന് ഇത്തരം മൂല്യനിർണയം സഹായകരമാകുമെന്നാണ് വിലയിരുത്തൽ. വിദഗ്ധർ, ഗവേഷകർ, സർക്കാർ ഏജൻസികൾ, അന്താരാഷ്ട്ര സംഘടനകൾ എന്നിവരിൽ നിന്ന് അഭിപ്രായങ്ങളും നിർദേശങ്ങളും മന്ത്രാലയം ക്ഷണിച്ചിട്ടുണ്ട്.