തിരുവനന്തപുരം, 2026 ജൂൺ 22 –

സംസ്ഥാനത്ത് ജനജീവിതത്തിന് വലിയ ഭീഷണിയായി മാറിയിരിക്കുന്ന കാട്ടുപന്നികളെ നിയന്ത്രിക്കാൻ പ്രത്യേക നടപടികളുമായി വനം വകുപ്പ് രംഗത്തെത്തി. വനത്തിന് പുറത്തുള്ള ജനവാസ മേഖലകളിൽ ഏകദേശം 50,000 കാട്ടുപന്നികൾ ഉണ്ടെന്നാണ് വിലയിരുത്തലെന്ന് വനം മന്ത്രി ഷിബു ബേബി ജോൺ നിയമസഭയിൽ അറിയിച്ചു. പഴകുളം മധുവിന്റെ ശ്രദ്ധക്ഷണിക്കലിന് മറുപടി പറയുകയായിരുന്നു മന്ത്രി.

കാട്ടുപന്നികളുടെ എണ്ണം വ്യാപകമായി വർധിക്കുന്ന സാഹചര്യത്തിൽ നിലവിലെ നിയമങ്ങളുടെ അടിസ്ഥാനത്തിൽ നിയന്ത്രണ നടപടികൾ ശക്തമാക്കുമെന്ന് മന്ത്രി പറഞ്ഞു. ജൂലൈ മുതൽ ഓഗസ്റ്റ് വരെ പ്രത്യേക ഡ്രൈവ് നടത്തും. പല പഞ്ചായത്തുകളിലും പന്നികളെ വെടിവെച്ച് നിയന്ത്രിക്കാൻ ഷൂട്ടർമാരില്ലാത്ത സാഹചര്യമുള്ളതിനാൽ ആവശ്യമായ സ്ഥലങ്ങളിൽ ഷൂട്ടർമാരെ നിയമിക്കുമെന്നും മന്ത്രി വ്യക്തമാക്കി.

കർഷകർ നേരിടുന്ന പ്രതിസന്ധി അതിരൂക്ഷമാണെന്നും അവരുടെ ആശങ്കകൾ പരിഗണിച്ചായിരിക്കും തുടർനടപടികളെന്നും മന്ത്രി പറഞ്ഞു. കർഷകരെ വിശ്വാസത്തിലെടുത്ത് സഹകരണത്തോടെ പ്രവർത്തിക്കുകയാണ് സർക്കാർ ലക്ഷ്യമിടുന്നതെന്നും വനം വകുപ്പ് കർഷകരുടെ ശത്രുവല്ലെന്ന നിലപാടാണ് സർക്കാരിനുള്ളതെന്നും അദ്ദേഹം കൂട്ടിച്ചേർത്തു. അതേസമയം, വയനാട്ടിലെ വന്യമൃഗങ്ങളുടെ വഹിക്കാനുള്ള ശേഷി പഠിക്കാൻ പ്രത്യേക സംഘത്തെ നിയോഗിച്ചിട്ടുണ്ടെന്നും റിപ്പോർട്ടിന്റെ അടിസ്ഥാനത്തിൽ തുടർനടപടികൾ സ്വീകരിക്കുമെന്നും മന്ത്രി അറിയിച്ചു.