പഞ്ചായത്ത് നേതൃത്വത്തിലുള്ള സേവന വിതരണം ശക്തിപ്പെടുത്തുന്നതിനായി ശ്രീനഗറിൽ ഇന്ന് മേഖലാ ശിൽപശാല സംഘടിപ്പിക്കുന്നു. പഞ്ചായത്ത് രാജ് മന്ത്രാലയത്തിന്റെ നേതൃത്വത്തിൽ നടക്കുന്ന ഈ പരിപാടി “സേവാ സേ സമൃദ്ധി” പരമ്പരയുടെ ഭാഗമാണ്. ജമ്മു കശ്മീരിലെ ശ്രീനഗറിലാണ് ശിൽപശാല നടക്കുന്നത്. ഹരിയാന, ഹിമാചൽ പ്രദേശ്, ജമ്മു കശ്മീർ, ജാർഖണ്ഡ്, കർണാടക, ഉത്തരാഖണ്ഡ്, ഉത്തർ പ്രദേശ് എന്നീ ഏഴ് സംസ്ഥാനങ്ങളിൽ നിന്നുള്ള പ്രതിനിധികൾ പരിപാടിയിൽ പങ്കെടുക്കും.

ജമ്മു കശ്മീർ ലെഫ്റ്റനന്റ് ഗവർണർ മനോജ് സിൻഹ ശിൽപശാല ഉദ്ഘാടനം ചെയ്യും. ഗ്രാമീണ വികസനവും പഞ്ചായത്ത് രാജും കൈകാര്യം ചെയ്യുന്ന ജമ്മു കശ്മീർ മന്ത്രിയും കേന്ദ്ര പഞ്ചായത്ത് രാജ് മന്ത്രാലയത്തിലെ മുതിർന്ന ഉദ്യോഗസ്ഥരും ചടങ്ങിൽ പങ്കെടുക്കും. കേന്ദ്ര ഇലക്ട്രോണിക്സ്, വിവരസാങ്കേതിക മന്ത്രാലയവുമായി ബന്ധപ്പെട്ട പൊതുസേവന കേന്ദ്ര സംവിധാനവും ജമ്മു കശ്മീർ ഗ്രാമീണ വികസന-പഞ്ചായത്ത് രാജ് വകുപ്പും ചേർന്നാണ് പരിപാടി സംഘടിപ്പിക്കുന്നത്. ഗ്രാമീണ മേഖലകളിലെ സേവന വിതരണം മെച്ചപ്പെടുത്തുകയും ജനങ്ങളുടെ ജീവിതസൗകര്യം വർധിപ്പിക്കുകയും ചെയ്യുക എന്ന ലക്ഷ്യത്തോടെയാണ് ഈ നീക്കം.

ശാക്തീകരിക്കപ്പെട്ടതും ഉത്തരവാദിത്തമുള്ളതുമായ തദ്ദേശ സ്ഥാപനങ്ങളിലൂടെ ഗ്രാമീണ സേവനങ്ങൾ കൂടുതൽ ഫലപ്രദമാക്കാനുള്ള ശ്രമങ്ങളുടെ തുടർച്ചയായാണ് ശിൽപശാല നടക്കുന്നത്. സാമൂഹിക സംഘടനകൾ, വിദ്യാഭ്യാസ-ഗവേഷണ സ്ഥാപനങ്ങൾ, ഗ്രാമീണ സാങ്കേതിക മേഖലയിൽ പ്രവർത്തിക്കുന്ന സംഘടനകൾ എന്നിവയുടെ പ്രതിനിധികളും പങ്കെടുക്കും. മികച്ച പ്രകടനം കാഴ്ചവച്ച ഗ്രാമപഞ്ചായത്തുകളെയും പൊതുസേവന കേന്ദ്രങ്ങളെയും ആദരിക്കും. ചർച്ചകൾ, സാങ്കേതിക സെഷനുകൾ, സംസ്ഥാനതല അനുഭവപങ്കിടലുകൾ എന്നിവയിലൂടെ സംസ്ഥാനങ്ങൾക്കിടയിലെ അറിവ് കൈമാറ്റത്തിനും മാതൃകകൾ പ്രചരിപ്പിക്കുന്നതിനും വേദിയൊരുങ്ങും.