ന്യൂഡൽഹി, 2026 ജൂൺ 19

ജൂൺ 19 മുതൽ 24 വരെ ന്യൂഡൽഹിയിലെ ഭാരത് മണ്ഡപത്തിൽ നടക്കുന്ന ഏഷ്യൻ സീനിയർ ഫെൻസിങ് ചാമ്പ്യൻഷിപ്പിനായുള്ള ഒരുക്കങ്ങൾ കേന്ദ്ര യുവജനകാര്യ-കായിക സഹമന്ത്രി രക്ഷ ഖഡ്സെ വിലയിരുത്തി. ഭൂഖണ്ഡതലത്തിലെ ഈ പ്രധാന മത്സരം ഇന്ത്യ ആദ്യമായാണ് ആതിഥേയത്വം വഹിക്കുന്നത്. ജൂൺ 19 വൈകുന്നേരം ഉദ്ഘാടനച്ചടങ്ങോടെയാണ് മത്സരങ്ങൾക്ക് തുടക്കമാകുക. 36 രാജ്യങ്ങളിൽ നിന്നുള്ള താരങ്ങളും പ്രതിനിധികളും ഉൾപ്പെടെ 787 പേർ പങ്കെടുക്കും.

ഭാരതീയ ഫെൻസിങ് അസോസിയേഷൻ ഭാരവാഹികളോടൊപ്പമാണ് മന്ത്രി വേദി സന്ദർശിച്ചത്. മത്സര സൗകര്യങ്ങൾ, താരങ്ങൾക്കുള്ള സംവിധാനങ്ങൾ, സാങ്കേതിക സഹായത്തോടെയുള്ള വിധിനിർണയ സംവിധാനം എന്നിവ മന്ത്രി പരിശോധിച്ചു. ആധുനിക സാങ്കേതികവിദ്യ പരിശീലനത്തിലും പ്രകടന വിലയിരുത്തലിലും മത്സര നടത്തിപ്പിലും വലിയ പങ്ക് വഹിക്കുന്നതായി മന്ത്രി അഭിപ്രായപ്പെട്ടു. ഈ മത്സരം രാജ്യത്തിന്റെ കായിക ശേഷിയും അന്താരാഷ്ട്ര നിലവാരത്തിലുള്ള മത്സരങ്ങൾ സംഘടിപ്പിക്കാനുള്ള കഴിവും പ്രകടമാക്കുന്നതാണെന്നും അവർ പറഞ്ഞു.

ഇന്ത്യ ആദ്യമായി സംഘടിപ്പിക്കുന്ന ഈ ചാമ്പ്യൻഷിപ്പ് രാജ്യത്തിന്റെ കായിക രംഗത്തെ ഒരു പ്രധാന നാഴികക്കല്ലായാണ് വിലയിരുത്തപ്പെടുന്നത്. താരകേന്ദ്രിത വികസനം, കായികശാസ്ത്രം, സാങ്കേതികവിദ്യയുടെ ഉപയോഗം, അടിസ്ഥാനസൗകര്യ വികസനം, അന്താരാഷ്ട്ര സഹകരണം എന്നിവയ്ക്ക് പ്രാധാന്യം നൽകുന്ന ദേശീയ കായിക നയത്തിന്റെ ലക്ഷ്യങ്ങളുമായി ഈ മത്സരം ചേർന്നുനിൽക്കുന്നതായും വിലയിരുത്തപ്പെടുന്നു. ഇത്തരം മത്സരങ്ങൾ ഇന്ത്യൻ താരങ്ങൾക്ക് ലോകോത്തര താരങ്ങളോടൊപ്പം മത്സരിക്കാനുള്ള അവസരവും നൽകും.