പ്രിയദർശിനി പദ്ധതി റദ്ദാക്കണമെന്ന ഹർജി; വിധി പറയാൻ മാറ്റി ഹൈക്കോടതി

കൊച്ചി, 2026 ജൂൺ 18 –

കെഎസ്ആർടിസി ബസുകളിൽ സ്ത്രീകൾക്ക് സൗജന്യ യാത്ര അനുവദിക്കുന്ന പ്രിയദർശിനി പദ്ധതി റദ്ദാക്കണമെന്നാവശ്യപ്പെട്ട പൊതുതാൽപര്യ ഹർജിയിൽ ഹൈക്കോടതി വിധി പറയാൻ മാറ്റി. പദ്ധതി രാഷ്ട്രീയ നേട്ടത്തിനായി നടപ്പാക്കിയ തെരഞ്ഞെടുപ്പ് വാഗ്ദാനമാണെന്ന് ഹർജിക്കാരൻ കോടതിയിൽ വാദിച്ചു. എന്നാൽ സർക്കാർ നൽകിയ വാഗ്ദാനം പാലിച്ചതിനെ എങ്ങനെ ചോദ്യം ചെയ്യാനാകുമെന്ന് കോടതി ചോദിച്ചു. തുടർന്നാണ് ഹർജി വിധി പറയാനായി മാറ്റിയത്.

സ്ത്രീ ശാക്തീകരണമാണ് പദ്ധതിയുടെ ലക്ഷ്യമെന്ന് സർക്കാർ കോടതിയെ അറിയിച്ചു. കർണാടക, തമിഴ്നാട്, പശ്ചിമ ബംഗാൾ ഉൾപ്പെടെ ഏഴ് സംസ്ഥാനങ്ങളിൽ സമാന പദ്ധതികൾ നടപ്പിലാക്കിയിട്ടുണ്ടെന്നും സർക്കാർ വ്യക്തമാക്കി. പദ്ധതിയുടെ പ്രയോജനം പ്രധാനമായും സാമ്പത്തികമായി പിന്നാക്കം നിൽക്കുന്ന സ്ത്രീകൾക്കല്ലേയെന്ന് കോടതി ചോദിച്ചു. അതേസമയം ശാസ്ത്രീയ പഠനമോ സാമ്പത്തിക ആഘാത വിലയിരുത്തലോ നടത്താതെയാണ് പദ്ധതി നടപ്പാക്കിയതെന്നാണ് ഹർജിക്കാരന്റെ വാദം.

പദ്ധതി മൂലം സംസ്ഥാനത്തിന് പ്രതിവർഷം ഏകദേശം 800 കോടി രൂപയുടെ സാമ്പത്തിക ബാധ്യത ഉണ്ടാകുമെന്നും ഹർജിയിൽ ചൂണ്ടിക്കാട്ടുന്നു. പുരുഷന്മാരെയും സ്ത്രീകളെയും ലിംഗത്തിന്റെ അടിസ്ഥാനത്തിൽ മാത്രം വേർതിരിക്കുന്നത് വിവേചനപരവും ഭരണഘടനാ വിരുദ്ധവുമാണെന്നും ഹർജിക്കാരൻ ആരോപിക്കുന്നു. പൊതുജനങ്ങളുടെ നികുതിപ്പണം ഉപയോഗിച്ച് നടപ്പാക്കുന്ന പദ്ധതി റദ്ദാക്കണമെന്നും കേസ് തീർപ്പാകുന്നതുവരെ തുടർനടപടികൾ സ്റ്റേ ചെയ്യണമെന്നും ഹർജിയിൽ ആവശ്യപ്പെട്ടിട്ടുണ്ട്.