കോഴിക്കോട് ജില്ലയിൽ വീണ്ടും മലേറിയ; 63 വയസുകാരന് രോഗം സ്ഥിരീകരിച്ചു

കോഴിക്കോട്, 2026 ജൂൺ 15 –

കോഴിക്കോട് ജില്ലയിൽ വീണ്ടും മലേറിയ രോഗം സ്ഥിരീകരിച്ചു. ഒളവണ്ണ സ്വദേശിയായ 63 വയസുകാരനാണ് രോഗബാധ സ്ഥിരീകരിച്ചത്. ചുമട്ടുതൊഴിലാളിയായ ഇയാൾ നിലവിൽ ബീച്ച് ആശുപത്രിയിൽ ചികിത്സയിലാണ്. സ്വകാര്യ ആശുപത്രിയിൽ ചികിത്സയിൽ കഴിയുന്നതിനിടെ പനി ശക്തമായതിനെ തുടർന്ന് നടത്തിയ പരിശോധനയിലാണ് മലേറിയ കണ്ടെത്തിയത്.

രോഗബാധിതൻ അതിഥി തൊഴിലാളികൾ തിങ്ങിപ്പാർക്കുന്ന പ്രദേശത്താണ് താമസിക്കുന്നത്. അവിടെ താമസിക്കുന്ന ആർക്കെങ്കിലും മലേറിയ ബാധ ഉണ്ടായിരിക്കാമെന്നും അതുവഴിയായിരിക്കാം രോഗം പകർന്നതെന്നുമാണ് ആരോഗ്യവകുപ്പിന്റെ പ്രാഥമിക നിഗമനം. രോഗം സ്ഥിരീകരിച്ചതോടെ പ്രദേശത്ത് പ്രതിരോധ പ്രവർത്തനങ്ങൾ ആരംഭിച്ചിട്ടുണ്ട്.

ജില്ലയിൽ അടുത്തിടെ റിപ്പോർട്ട് ചെയ്യുന്ന രണ്ടാമത്തെ മലേറിയ കേസാണിത്. കഴിഞ്ഞ ദിവസം തിക്കോടിയിൽ ഒരു ഇതരസംസ്ഥാന തൊഴിലാളിക്കും മലേറിയ സ്ഥിരീകരിച്ചിരുന്നു. മധ്യപ്രദേശ് സ്വദേശിയായ ഇയാൾ കോഴിക്കോട് മെഡിക്കൽ കോളേജ് ആശുപത്രിയിൽ ചികിത്സയിലാണ്. പുതിയ കേസുകൾ റിപ്പോർട്ട് ചെയ്ത സാഹചര്യത്തിൽ ആരോഗ്യവകുപ്പ് നിരീക്ഷണവും പ്രതിരോധ നടപടികളും ശക്തമാക്കിയിട്ടുണ്ട്.