കണ്ണൂർ, 2026 ജൂൺ 15 –
കണ്ണൂർ അഴീക്കോട് മൂന്ന് നിരത്തിൽ 1.140 കിലോഗ്രാം കഞ്ചാവുമായി യുവാവിനെ എക്സൈസ് സംഘം അറസ്റ്റ് ചെയ്തു. ഒഡീഷ സ്വദേശി ജാദു ഗോഡൈ (34) ആണ് പിടിയിലായത്. കണ്ണൂർ ജില്ലയിലെ വിവിധ ഭാഗങ്ങളിൽ ഇതര സംസ്ഥാന തൊഴിലാളികൾക്ക് കഞ്ചാവ് വിതരണം ചെയ്തിരുന്ന ആളാണ് അറസ്റ്റിലായതെന്ന് എക്സൈസ് അധികൃതർ അറിയിച്ചു.
അന്യസംസ്ഥാന തൊഴിലാളികളെയാണ് പ്രധാനമായും ലക്ഷ്യമിട്ട് കഞ്ചാവ് വിതരണം ചെയ്തിരുന്നതെന്നാണ് അന്വേഷണത്തിൽ കണ്ടെത്തിയത്. ഓൺലൈൻ വഴി പണം സ്വീകരിച്ച ശേഷം കഞ്ചാവ് എത്തിച്ചുനൽകുന്നതായിരുന്നു പ്രതിയുടെ രീതി. വിശ്വസ്തരായ ചില ഇതര സംസ്ഥാന തൊഴിലാളികൾക്ക് മാത്രമായിരുന്നു വിൽപന നടത്തിയിരുന്നതെന്നും എക്സൈസ് ഉദ്യോഗസ്ഥർ വ്യക്തമാക്കി.
പ്രിവന്റീവ് ഓഫീസർ ഗ്രേഡ് പങ്കജാഷൻ സി, രജിരാഗ് പി.പി, സിവിൽ എക്സൈസ് ഓഫീസർമാരായ രമിത്ത് കെ, റെനിൽ കൃഷ്ണൻ, അമൽ കെ, ഡ്രൈവർ ജോജൻ എന്നിവരടങ്ങിയ സംഘമാണ് പ്രതിയെ പിടികൂടിയത്. സംഭവത്തിൽ കൂടുതൽ അന്വേഷണം തുടരുകയാണ്.
