ശക്തമായ മഴയും കാറ്റും; തിരുവനന്തപുരം നഗരത്തിൽ മരങ്ങൾ നിലംപൊത്തി

പേരൂർക്കട, 2026 ജൂൺ 13 –

ശക്തമായ മഴയിലും കാറ്റിലും തിരുവനന്തപുരം നഗരത്തിന്റെ വിവിധ ഭാഗങ്ങളിൽ തണൽമരങ്ങൾ നിലംപൊത്തി. കവടിയാർ, പാങ്ങോട്, ശ്രീവരാഹം, കളിപ്പാൻകുളം, മ്യൂസിയം മേഖലകളിലാണ് മരങ്ങൾ വീണ് ഗതാഗത തടസം ഉണ്ടായത്. കവടിയാർ മൻമോഹൻ ബംഗ്ലാവിന് മുന്നിൽ റോഡിലേക്ക് വീണ തണൽമരം ഗതാഗതത്തെ ബാധിച്ചു.

കവടിയാർ റോഡിൽ വീണ മരം ഫയർഫോഴ്‌സ് എത്തി മുറിച്ചുനീക്കി. പാങ്ങോട് ആർമി ക്യാമ്പിലും ഒരു തണൽമരം കടപുഴകി വീണു. ശ്രീവരാഹം ഗവൺമെന്റ് സ്കൂളിന് മുന്നിലുണ്ടായിരുന്ന തേക്കുമരം റോഡിലേക്ക് വീണതിനെ തുടർന്ന് ഒരു മണിക്കൂറോളം ഗതാഗതം തടസപ്പെട്ടു. കളിപ്പാൻകുളത്ത് മാവ് ഒടിഞ്ഞുവീണും ഗതാഗത തടസം ഉണ്ടായി.

മ്യൂസിയം മേഖലയിൽ ഇലക്ട്രിക് ലൈനിലേക്ക് മുളങ്കൂട്ടം ഒടിഞ്ഞുവീണതിനെ തുടർന്ന് നന്ദൻകോട് – മ്യൂസിയം റോഡിലെ യാത്രയും ഒരു മണിക്കൂറോളം ദുഷ്കരമായി. മഴയും കാറ്റും തുടരുന്ന സാഹചര്യത്തിൽ വിവിധ മേഖലകളിൽ ജാഗ്രത തുടരുകയാണ്.