നരേന്ദ്ര മോദി സർക്കാരിന്റെ 12 വർഷത്തെ പ്രവർത്തനം ഇന്ത്യയെ അവസരങ്ങളും നവീകരണവും ആത്മവിശ്വാസവും മുന്നോട്ടുനയിക്കുന്ന അഭിലാഷങ്ങളുടെ രാജ്യമായി മാറ്റിയെന്ന് കേന്ദ്രമന്ത്രി ഡോ. ജിതേന്ദ്ര സിങ് പറഞ്ഞു. മാധ്യമങ്ങളോട് സംസാരിക്കവെയാണ് അദ്ദേഹം ഈ വിലയിരുത്തൽ നടത്തിയത്. തുടർച്ചയായി തെരഞ്ഞെടുക്കപ്പെട്ട പ്രധാനമന്ത്രിയായി മോദി 4,399 ദിവസം പൂർത്തിയാക്കിയ പശ്ചാത്തലത്തിലാണ് പ്രതികരണം. നിലവിൽ ഏകദേശം 9 ബില്യൺ ഡോളർ മൂല്യമുള്ള ഇന്ത്യയുടെ ബഹിരാകാശ സമ്പദ്‌വ്യവസ്ഥ അടുത്ത ഏഴ് മുതൽ എട്ട് വർഷത്തിനുള്ളിൽ 45 ബില്യൺ ഡോളറിലെത്തുമെന്ന പ്രതീക്ഷയും മന്ത്രി പങ്കുവച്ചു.

ഭരണപരിഷ്കാരങ്ങൾ, സാങ്കേതികവിദ്യയുടെ വ്യാപനം, പൗരകേന്ദ്രീകൃത നയങ്ങൾ എന്നിവ ഇന്ത്യക്കാരുടെ ചിന്താഗതിയിൽ വലിയ മാറ്റമുണ്ടാക്കിയെന്ന് അദ്ദേഹം പറഞ്ഞു. രേഖകൾക്ക് ഗസറ്റഡ് ഓഫീസർ സാക്ഷ്യപ്പെടുത്തൽ ഒഴിവാക്കി സ്വയം സാക്ഷ്യപ്പെടുത്തൽ അനുവദിച്ചതും ചില സർക്കാർ നിയമനങ്ങളിൽ അഭിമുഖം ഒഴിവാക്കിയതും പ്രധാന പരിഷ്കാരങ്ങളായി അദ്ദേഹം ചൂണ്ടിക്കാട്ടി. ഇതിലൂടെ ശുപാർശയല്ല, കഴിവും കഠിനാധ്വാനവുമാണ് വിജയത്തിലേക്കുള്ള വഴി എന്ന വിശ്വാസം ശക്തമായതായി അദ്ദേഹം പറഞ്ഞു. ഏതാനും വർഷങ്ങൾക്ക് മുമ്പ് ഒറ്റ അക്കത്തിൽ ഉണ്ടായിരുന്ന ബഹിരാകാശ സംരംഭങ്ങളുടെ എണ്ണം ഇപ്പോൾ ഏകദേശം 400 ആയി ഉയർന്നതായും രാജ്യത്തെ സംരംഭകത്വ രംഗം 2014-ലെ 350 മുതൽ 400 വരെ ഉണ്ടായിരുന്നതിൽ നിന്ന് ഇന്ന് 2.3 ലക്ഷത്തിലധികമായി വളർന്നതായും അദ്ദേഹം വ്യക്തമാക്കി.

കഴിഞ്ഞ 12 വർഷത്തിനിടെ ഇന്ത്യയിൽ ഉണ്ടായ ഏറ്റവും വലിയ മാറ്റം മനോഭാവത്തിലുള്ള മാറ്റമാണെന്നും ഡോ. ജിതേന്ദ്ര സിങ് അഭിപ്രായപ്പെട്ടു. ചെറുപട്ടണങ്ങളിൽ നിന്നുള്ളവരും മഹാനഗരങ്ങൾക്ക് പുറത്തുനിന്നുള്ളവരും കൂടുതൽ സിവിൽ സർവീസ് വിജയികളായി ഉയർന്നുവരുന്നത് അവസരങ്ങളുടെ വ്യാപനത്തിന്റെ തെളിവാണെന്ന് അദ്ദേഹം പറഞ്ഞു. ചന്ദ്രയാൻ ദൗത്യങ്ങൾ ഉൾപ്പെടെയുള്ള ശാസ്ത്രനേട്ടങ്ങൾ ജനങ്ങളിൽ ശാസ്ത്രത്തോടുള്ള താൽപര്യം വർധിപ്പിച്ചെന്നും ബഹിരാകാശ, ആണവ മേഖലകളിൽ സ്വകാര്യ പങ്കാളിത്തം അനുവദിച്ചതിലൂടെ നവീകരണത്തിനും തൊഴിൽ അവസരങ്ങൾക്കും കൂടുതൽ സാധ്യതകൾ തുറന്നതായും അദ്ദേഹം പറഞ്ഞു. വനിതകളുടെയും യുവജനങ്ങളുടെയും കൂടുതൽ പങ്കാളിത്തത്തോടെയും ബഹിരാകാശം, ആണവോർജം, ക്വാണ്ടം സാങ്കേതികവിദ്യ തുടങ്ങിയ മേഖലകളുടെ വികസനത്തോടെയും 2047-ഓടെ വികസിത ഇന്ത്യ എന്ന ലക്ഷ്യത്തിലേക്ക് രാജ്യം മുന്നേറുമെന്നാണ് അദ്ദേഹത്തിന്റെ വിലയിരുത്തൽ.