ലോക സൈക്കിൾ ദിനാഘോഷത്തിന്റെ ഭാഗമായി രാജ്യവ്യാപകമായി പ്രത്യേക സൈക്കിൾ പരിപാടി സംഘടിപ്പിച്ചു. ന്യൂഡൽഹിയിലെ ജവഹർലാൽ നെഹ്റു സ്റ്റേഡിയത്തിൽ നടന്ന പ്രധാന പരിപാടിക്ക് യുവജനകാര്യ-കായിക മന്ത്രി മൻസുഖ് മാണ്ഡവിയ നേതൃത്വം നൽകി. നടൻ വിക്രാന്ത് മാസി, ബോക്സർ നുപുർ ഷിയോറൻ, നടി രാഗിണി ദ്വിവേദി എന്നിവരും പങ്കെടുത്തു. ന്യൂഡൽഹിയിൽ മാത്രം പതിനയ്യായിരത്തിലേറെ പേർ സൈക്കിൾ ചവിട്ടി. രാജ്യത്തിന്റെ വിവിധ ഭാഗങ്ങളിലായി നാല് ലക്ഷത്തിലേറെ ആളുകൾ ഈ ഏകദിന സൈക്കിൾ പരിപാടിയിൽ പങ്കാളികളായി.

ആരോഗ്യം സംരക്ഷിക്കാനും ശാരീരികക്ഷമത വർധിപ്പിക്കാനും പരിസ്ഥിതി സംരക്ഷണം പ്രോത്സാഹിപ്പി ക്കാനുമാണ്  പരിപാടി സംഘടിപ്പിച്ചത്. വിവിധ സംസ്ഥാനങ്ങളിലെ കായിക വകുപ്പുകൾ, സായുധ സേനാ വിഭാഗങ്ങൾ, സുരക്ഷാ സേനകൾ, സന്നദ്ധസംഘടനകൾ, കായികതാരങ്ങൾ, വിദ്യാർഥി സംഘടനകൾ, പൊതുജനങ്ങൾ തുടങ്ങി വലിയൊരു വിഭാഗം പങ്കെടുത്തു. സ്ത്രീകൾക്കായി പ്രത്യേക സൈക്കിൾ മത്സരങ്ങളും നടത്തി. പൊതുജനങ്ങൾക്കായി ബാഡ്മിന്റൺ, ചെസ്, കരംസ്, ലുഡോ തുടങ്ങിയ വിനോദപരിപാടികളും ഒരുക്കിയിരുന്നു.

രണ്ടായിരത്തി ഇരുപത്തിനാല് ഡിസംബറിൽ ആരംഭിച്ച ഈ സൈക്കിൾ സംരംഭം ഇതിനകം മുപ്പത് ലക്ഷത്തിലേറെ ആളുകളിലേക്ക് എത്തിയതായി അധികൃതർ അറിയിച്ചു. രാജ്യത്ത് ശാരീരികക്ഷമതയെക്കുറിച്ചുള്ള ബോധവൽക്കരണം വർധിപ്പിക്കുന്നതിൽ ഈ പരിപാടി സഹായിച്ചുവെന്നാണ് പങ്കെടുത്തവരുടെ വിലയിരുത്തൽ. ദിവസവും കുറച്ച് സമയം സൈക്കിൾ ചവിട്ടുകയോ മറ്റ് ശാരീരിക പ്രവർത്തനങ്ങളിൽ ഏർപ്പെടുകയോ ചെയ്യണമെന്ന് സംഘാടകരും പങ്കെടുത്ത പ്രമുഖരും ആഹ്വാനം ചെയ്തു. രാജ്യത്തെ എല്ലാ സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും വിവിധ കേന്ദ്രങ്ങളിൽ പരിപാടി ഒരേസമയം സംഘടിപ്പിച്ചു.