അബുദാബി ബിഗ് ടിക്കറ്റ് നറുക്കെടുപ്പിൽ ഒന്നാം സമ്മാനം ഉൾപ്പെടെ എട്ട് സമ്മാനങ്ങളും ഇന്ത്യക്കാർക്ക്

അബുദാബി: അബുദാബി ബിഗ് ടിക്കറ്റ് നറുക്കെടുപ്പിൽ പ്രവാസിക്ക് ഒന്നരക്കോടി ദിർഹത്തിന്റെ (33 കോടിയിലധികം ഇന്ത്യൻ രൂപ) സമ്മാനം. അബുദാബിയിൽ താമസിക്കുന്ന പ്രദീപ് കുമാറാണ് ബിഗ് ടിക്കറ്റിന്റെ 251-ാം സീരിസ് നറുക്കെടുപ്പിലെ വിജയിയായത്. 2023 മെയ് 3 ബുധനാഴ്ച രാത്രിയാണ് നറുക്കെടുപ്പ് നടന്നത്. ഏപ്രിൽ 13ന് ബിഗ് ടിക്കറ്റ് സ്റ്റോർ കൗണ്ടർ വഴി നേരിട്ടെടുത്ത 048514 നമ്പർ ടിക്കറ്റിലൂടെയാണ് അദ്ദേഹത്തെ ഭാഗ്യം തേടിയെത്തിയത്. നറുക്കെടുപ്പ് നടക്കുമ്പോൾ നാട്ടിൽ നിന്ന് അബുദാബിയിലേക്കുള്ള മടക്കയാത്രയ്ക്കായി വിമാനത്താവളത്തിൽ നിൽക്കുകയായിരുന്നു പ്രദീപ്.

ടിക്കറ്റെടുത്തപ്പോൾ നൽകിയിരുന്ന യുഎഇ ഫോൺ നമ്പറിൽ ബന്ധപ്പെടാൻ ശ്രമിച്ചെങ്കിലും സാധിക്കാതെ വന്നതോടെയാണ് ബിഗ് ടിക്കറ്റ് സംഘാടകർ പ്രദീപ് നൽകിയിരുന്ന ഇന്ത്യൻ നമ്പറിൽ വിളിച്ചത്. ഫോൺ എടുത്തതിന് പിന്നാലെ കോടീശ്വരനായ വിവരം അറിയിച്ചപ്പോൾ അദ്ദേഹം സന്തോഷം മറച്ചുവെച്ചില്ല. അവധിക്ക് ശേഷം അബുദാബിയിലേക്ക് തിരികെ വരികയാണെന്നും അതിയായ സന്തോഷമുണ്ടെന്നും പ്രദീപ് പ്രതികരിച്ചു. താനും മൂന്ന് സുഹൃത്തുക്കളും ചേർന്നാണ് സമ്മാനാർഹമായ ഈ ടിക്കറ്റെടുത്തതെന്നും അദ്ദേഹം അറിയിച്ചു.

03/05/23 ബുധനാഴ്ച രാത്രി നടന്ന ബിഗ് ടിക്കറ്റ് നറുക്കെടുപ്പിൽ ഒന്നാം സമ്മാനം ഉൾപ്പെടെ ആകെ എട്ട് സമ്മാനങ്ങളും ഇന്ത്യക്കാർക്ക് തന്നെയായിരുന്നു. ശ്രീലങ്കൻ പൗരനായ റുവാൻ ചതുരംഗയാണ് ഒരു ലക്ഷം ദിർഹത്തിന്റെ രണ്ടാം സമ്മാനം നേടിയത്. ഓൺലൈനിലൂടെ എടുത്ത 037136 എന്ന നമ്പറിലുള്ള ടിക്കറ്റിലൂടെയാണ് അദ്ദേഹം വിജയിയായത്. ഇന്ത്യക്കാരായ പുർവി പത്‍നി (ടിക്കറ്റ് നമ്പർ – 191196) 90,000 ദിർഹത്തിന്റെ മൂന്നാം സമ്മാനവും ഫാറൂഖ് വെട്ടിക്കാട്ട് വളപ്പിൽ 100341 എന്ന നമ്പറിലുള്ള ടിക്കറ്റിലൂടെ 80,000 ദിർഹത്തിന്റെ നാലാം സമ്മാനവും സ്വന്തമാക്കി. 032679 എന്ന ടിക്കറ്റെടുത്ത സൂരജ് കുമാർ ടി.എസിനാണ് 70,000 ദിർഹത്തിന്റെ അഞ്ചാം സമ്മാനം.

ഇന്ത്യൻ പൗരന്മാരായ ലിൻസൻ‍ ജോൺ (ടിക്കറ്റ് നമ്പർ – 004349), റോയ് സെബാസ്റ്റ്യൻ (ടിക്കറ്റ് നമ്പർ – 341651) എന്നിവർ ആറും ആഴും സമ്മാനങ്ങൾ നേടി യഥാക്രമം 60,000 ദിർഹവും 50,000 ദിർഹവും നേടി. ഈജിപ്ഷ്യൻ സ്വദേശിയായ അഹ്‍മദ് ഗലാൽ മുഹമ്മദ് ഫാരിദ് ഗാദിനാണ് 40,000 ദിർഹത്തിന്റെ എട്ടാം സമ്മാനം. 30,000 ദിർഹത്തിന്റെ ഒൻപതാം സമ്മാനം ഇന്ത്യക്കാരനായ മുഹമ്മദ് ദിൽഷാദ് സയ്യദിന് ലഭിച്ചു. 102173 ആയിരുന്നു അദ്ദേഹത്തിന്റെ ടിക്കറ്റ് നമ്പർ. 296037 എന്ന ടിക്കറ്റിലൂടെ നാരയൺകുമാർ പ്രേംചന്ദ് 20,000 ദിർഹത്തിന്റെ അവസാന സമ്മാനവും നേടി. 04/05/23 വ്യാഴാഴ്ച നടന്ന ബിഗ് ടിക്കറ്റ് ഡ്രീം കാർ സീരിസ് നറുക്കെടുപ്പിൽ പാകിസ്ഥാൻ പൗരനായ മുഹമ്മദ് ഷഹബാസ് ഗുലാം യാസിനാണ് 010031 എന്ന നമ്പറിലൂടെ മസെറാട്ടിയുടെ ആഡംബര കാർ നേടിയത്.