തുറമുഖ വ്യവസായങ്ങൾക്ക് കൂടുതൽ ഇളവ്; പുതുക്കിയ നയത്തിന് കേന്ദ്രമന്ത്രിസഭയുടെ അംഗീകാരം

രാജ്യത്തെ പ്രധാന തുറമുഖങ്ങളിലെ ജലമുഖവും അനുബന്ധ ഭൂമിയും തുറമുഖാശ്രിത വ്യവസായങ്ങൾക്ക് അനുവദിക്കുന്ന പുതുക്കിയ നയത്തിന് കേന്ദ്രമന്ത്രിസഭ അംഗീകാരം നൽകി. ജൂലൈ 31നാണ് തീരുമാനം പ്രഖ്യാപിച്ചത്. സ്വകാര്യ നിക്ഷേപം വർധിപ്പിക്കുകയും തുറമുഖങ്ങളുടെ ശേഷി മെച്ചപ്പെടുത്തുകയും ചെയ്യുകയാണ് ലക്ഷ്യം.

കരാറുകൾ 30 വർഷംവരെ നീട്ടാം

നിലവിലുള്ള തുറമുഖാശ്രിത വ്യവസായങ്ങളുടെ കരാറുകൾ പുതിയ ടെൻഡറില്ലാതെ 30 വർഷംവരെ പുതുക്കാനോ നീട്ടാനോ പ്രധാന തുറമുഖ അതോറിറ്റികൾക്ക് കഴിയും. നിലവിലെ വിപണി നിരക്കും കരാർപ്രകാരമുള്ള പുതുക്കിയ വരുമാനത്തുകയും പരിശോധിച്ച്, ഇവയിൽ ഉയർന്ന തുകയായിരിക്കും ഈടാക്കുക. തുറമുഖങ്ങളുടെ വരുമാനം സംരക്ഷിച്ചുകൊണ്ട് നിക്ഷേപകർക്ക് ദീർഘകാല ഉറപ്പ് നൽകാനാണിത്.

ശേഷി കൂട്ടാൻ പുതിയ സൗകര്യങ്ങൾ

നിലവിലെ ഉപയോക്താക്കൾക്ക് പുതിയ ബെർത്തുകൾ, ജെട്ടികൾ, ടെർമിനലുകൾ, സിംഗിൾ ബോയി മൂറിങ് സൗകര്യങ്ങൾ എന്നിവ നിർമിക്കാം. മത്സരാധിഷ്ഠിത ലേലത്തിലൂടെയാണ് നിരക്ക് കണ്ടെത്തുക. ഏറ്റവും ഉയർന്ന തുക നൽകാൻ നിലവിലെ കരാറുകാരന് ആദ്യ നിരാകരണാവകാശവും ലഭിക്കും. അധിക സൗകര്യത്തിന്റെ കാലാവധി നിലവിലുള്ള കരാറിന്റെ പരമാവധി കാലാവധിക്കൊപ്പം അവസാനിക്കും.

സർക്കാർ സ്ഥാപനങ്ങൾക്ക് നേരിട്ട് പ്രവേശനം

കേന്ദ്ര-സംസ്ഥാന വകുപ്പുകൾ, പൊതുമേഖലാ സ്ഥാപനങ്ങൾ, സ്വയംഭരണ സ്ഥാപനങ്ങൾ, സർക്കാർ നിയന്ത്രിത സംയുക്ത സംരംഭങ്ങൾ എന്നിവയ്ക്ക് മത്സരലേലമില്ലാതെ ജലമുഖവും ഭൂമിയും അനുവദിക്കാം. നിശ്ചയിച്ച അടിസ്ഥാന നിരക്കിലായിരിക്കും അനുമതി. ചരക്കിന്റെ സ്വഭാവം മാറ്റാനും അപ്രതീക്ഷിത സാഹചര്യങ്ങളിൽ വ്യവസായ പദ്ധതി പരിഷ്‌കരിക്കാനും നയം അവസരം നൽകും. ഇതിലൂടെ ചരക്കുനീക്കം, തൊഴിൽ, വിതരണശൃംഖല, തുറമുഖ വരുമാനം എന്നിവ വർധിക്കുമെന്നാണ് കേന്ദ്രത്തിന്റെ പ്രതീക്ഷ..

.