ദേശീയ വ്യാപാരി ക്ഷേമ ബോർഡിന്റെ പത്താം യോഗം; ഡിജിറ്റൽ വ്യാപാര വ്യാപനത്തിന് കൂടുതൽ ഊന്നൽ

ന്യൂഡൽഹി, 2026 ജൂൺ 24

ദേശീയ വ്യാപാരി ക്ഷേമ ബോർഡിന്റെ പത്താം യോഗം ന്യൂഡൽഹിയിൽ സംയോജിത രീതിയിൽ നടന്നു. രാജ്യത്തിന്റെ വിവിധ ഭാഗങ്ങളിൽ നിന്നുള്ള അംഗങ്ങൾ നേരിട്ടും ഓൺലൈൻ വഴിയും യോഗത്തിൽ പങ്കെടുത്തു. വ്യാപാരി ക്ഷേമത്തിനും വ്യാപാര സൗകര്യങ്ങൾ വർധിപ്പിക്കുന്നതിനുമായി നടപ്പിലാക്കുന്ന വിവിധ പദ്ധതികൾ യോഗം വിലയിരുത്തി. ചെറുകിട വ്യാപാരികളെയും കിരാണ കടകളെയും ഡിജിറ്റൽ സമ്പദ്‌വ്യവസ്ഥയുടെ ഭാഗമാക്കാനുള്ള ഡിജി ദുകാൻ പദ്ധതിയുടെ വ്യാപനവും ചർച്ചയായി.

ദേശീയ വ്യാപാരി ക്ഷേമ ബോർഡ് അധ്യക്ഷൻ സുനിൽ ജെ. സിംഗിയുടെ അധ്യക്ഷതയിലാണ് യോഗം ചേർന്നത്. വ്യാപാര സംഘടനകൾ, നിർമാതാക്കൾ, കയറ്റുമതിക്കാർ, സേവനദാതാക്കൾ എന്നിവരെ ബാധിക്കുന്ന നിരവധി വിഷയങ്ങൾ അംഗങ്ങൾ ചർച്ച ചെയ്തു. നികുതി സംവിധാനത്തിലെ ലളിതവൽക്കരണം, കയറ്റുമതി പ്രോത്സാഹനം, കുറഞ്ഞ ചെലവിൽ വായ്പ ലഭ്യമാക്കൽ, ബാങ്കിങ് വിഷയങ്ങൾ, സാമൂഹിക സുരക്ഷാ പദ്ധതികൾ, വനിതാ സംരംഭകർക്ക് പിന്തുണ എന്നിവയാണ് പ്രധാനമായും ഉയർന്നുവന്നത്. രാജ്യത്തുടനീളം വ്യാപാരികളുമായും വിവിധ മന്ത്രാലയങ്ങളുമായും സ്ഥിരം ആശയവിനിമയം ഉറപ്പാക്കാൻ ഇതുവരെ തൊണ്ണൂറ്റിരണ്ട് പ്രതിവാര ഓൺലൈൻ കൂടിക്കാഴ്ചകൾ നടത്തിയതായും അറിയിച്ചു.

രാജസ്ഥാനിൽ അടുത്തിടെ ആരംഭിച്ച വ്യാപാര പ്രോത്സാഹന നയവും യോഗത്തിൽ വിലയിരുത്തി. ജയ്പൂരിൽ ആരംഭിച്ച ഡിജി ദുകാൻ പദ്ധതിക്ക് വ്യാപാരികളിൽ നിന്ന് മികച്ച പ്രതികരണമുണ്ടായതായി ബോർഡ് വിലയിരുത്തി. മുംബൈ, ബെംഗളൂരു ഉൾപ്പെടെയുള്ള പ്രധാന നഗരങ്ങളിലേക്കും തുടർന്ന് രാജ്യവ്യാപകമായും പദ്ധതി വ്യാപിപ്പിക്കാനുള്ള നീക്കങ്ങളും ചർച്ചയായി. വ്യാപാരികളുടെയും ചെറുകിട, ഇടത്തരം സംരംഭങ്ങളുടെയും കയറ്റുമതി പങ്കാളിത്തം വർധിപ്പിക്കാനും ഇന്ത്യയെ ആഗോളതലത്തിൽ കൂടുതൽ മത്സരക്ഷമമായ വ്യാപാരരാജ്യമാക്കാനും സ്ഥാപനപരമായ പിന്തുണ ശക്തിപ്പെടുത്തേണ്ടതിന്റെ ആവശ്യകതയും യോഗം ചൂണ്ടിക്കാട്ടി.