കേന്ദ്രമന്ത്രി ഡോ. ജിതേന്ദ്ര സിങ് ന്യൂഡൽഹിയിലെ കർത്തവ്യ ഭവനിൽ ഐഎഎസ് ഇ-സിവിൽ ലിസ്റ്റ് 2026 പുറത്തിറക്കി. ഉദ്യോഗസ്ഥരുടെ വിദ്യാഭ്യാസയോഗ്യത, പ്രവൃത്തിപരിചയം, കേഡർ, നിയമനവിവരങ്ങൾ എന്നിവ എളുപ്പത്തിൽ ലഭ്യമാക്കുന്ന ഈ ഡിജിറ്റൽ സംവിധാനം ഭരണപരമായ ആസൂത്രണത്തിനും തീരുമാനമെടുക്കലിനും സഹായകരമാകുമെന്ന് അദ്ദേഹം പറഞ്ഞു. 2026  ജനുവരി ഒന്നിലെ കണക്കുപ്രകാരം 25 കേഡറുകളിലായി 5955 ഐഎഎസ് ഉദ്യോഗസ്ഥരാണ് നിലവിലുള്ളത്.

ഭരണനിർവഹണത്തിൽ സാങ്കേതികവിദ്യയുടെ പങ്ക് വർധിക്കുന്ന സാഹചര്യത്തിലാണ് ഈ ഡിജിറ്റൽ പതിപ്പ് പുറത്തിറക്കിയത്. ഡാറ്റയെ അടിസ്ഥാനമാക്കിയുള്ള ഭരണരീതിക്ക് ഇത് കൂടുതൽ കരുത്തേകുമെന്നും ഉദ്യോഗസ്ഥരുടെ പ്രത്യേക വൈദഗ്ധ്യവും പരിചയവും കണ്ടെത്താൻ സഹായിക്കുമെന്നും ഡോ. ജിതേന്ദ്ര സിങ് വ്യക്തമാക്കി. കേന്ദ്രവും സംസ്ഥാനങ്ങളും ചേർന്നാണ് വിവരശേഖരണവും ഡാറ്റാബേസ് പുതുക്കലും നടത്തുന്നത്. ഇതിലൂടെ സുതാര്യതയും കാര്യക്ഷമതയും ലഭ്യമാകുമെന്നും അദ്ദേഹം പറഞ്ഞു.

സിവിൽ ലിസ്റ്റിന്റെ എഴുപത്തിയൊന്നാമത്തെ പതിപ്പാണ് ഇത്. ഇ-പുസ്തക രൂപത്തിൽ പുറത്തിറങ്ങുന്ന ആറാമത്തെ പതിപ്പുമാണിത്. ഉദ്യോഗസ്ഥരുടെ ബാച്ച്, കേഡർ, നിലവിലെ നിയമനം, ശമ്പളനില, വിദ്യാഭ്യാസയോഗ്യത, വിരമിക്കൽ തീയതി തുടങ്ങിയ വിവരങ്ങൾ ഇതിൽ ഉൾപ്പെടുത്തിയിട്ടുണ്ട്. അടുത്ത അഞ്ചുവർഷത്തിനുള്ളിൽ വിരമിക്കുന്ന ഉദ്യോഗസ്ഥരുടെ വിവരങ്ങളും വിവിധ കേഡറുകളിലെ ഉദ്യോഗസ്ഥരുടെ എണ്ണവും ഇതിലുണ്ട്. അച്ചടി പതിപ്പുകളിൽ നിന്ന് ഡിജിറ്റൽ രൂപത്തിലേക്കുള്ള മാറ്റം പൊതുഭരണത്തെ നവീകരിക്കാനുള്ള ശ്രമത്തിന്റെ ഭാഗമാണെന്നും ഇത് പൊതുസമ്പത്തിന്റെ കാര്യക്ഷമമായ ഉപയോഗത്തിന് സഹായകരമാണെന്നും മന്ത്രാലയം വ്യക്തമാക്കി.