“നൂറ് ശതമാനം” എന്ന തെറ്റിദ്ധരിപ്പിക്കുന്ന അവകാശവാദം; രണ്ട് ഭക്ഷ്യ കമ്പനികൾക്ക് പിഴ

ഭക്ഷ്യ ഉൽപ്പന്നങ്ങളിൽ “നൂറ് ശതമാനം” എന്ന അവകാശവാദം ഉപയോഗിച്ച് ഉപഭോക്താക്കളെ തെറ്റിദ്ധരിപ്പിച്ചെന്ന കണ്ടെത്തലിനെ തുടർന്ന് രണ്ട് കമ്പനികൾക്ക് കേന്ദ്ര ഉപഭോക്തൃ സംരക്ഷണ അതോറിറ്റി ഒരു ലക്ഷം രൂപ വീതം പിഴ ചുമത്തി. സ്റ്റോറിയ ഫുഡ്സ് ആൻഡ് ബെവറേജസ് പ്രൈവറ്റ് ലിമിറ്റഡിനും മിസിസ് ബെക്ടേഴ്സ് ഫുഡ് സ്പെഷ്യാലിറ്റീസ് ലിമിറ്റഡിനുമാണ് നടപടി. ഉൽപ്പന്നങ്ങളുടെ പാക്കേജിങ്, വെബ്സൈറ്റുകൾ, ഡിജിറ്റൽ വേദികൾ എന്നിവയിൽ നിന്നുള്ള തെറ്റിദ്ധരിപ്പിക്കുന്ന അവകാശവാദങ്ങൾ ഉടൻ പിൻവലിക്കാനും നിർദേശം നൽകിയിട്ടുണ്ട്.

ഉപഭോക്തൃ സംരക്ഷണ അതോറിറ്റിയുടെ പരിശോധനയിലാണ് നടപടി. സ്റ്റോറിയയുടെ ഇളനീർ വെള്ളവും വിവിധ ജ്യൂസ് ഉൽപ്പന്നങ്ങളും “നൂറ് ശതമാനം” എന്ന പേരിൽ പ്രചരിപ്പിച്ചിരുന്നെങ്കിലും അവയുടെ യഥാർത്ഥ ഘടന അതുമായി പൊരുത്തപ്പെടുന്നില്ലെന്ന് കണ്ടെത്തി. അതുപോലെ മിസിസ് ബെക്ടേഴ്സിന്റെ ബ്രെഡ് ഉൽപ്പന്നങ്ങൾ “നൂറ് ശതമാനം ഗോതമ്പ്” എന്ന് പ്രചരിപ്പിച്ചെങ്കിലും അവയിൽ എൺപത്തിയേഴ് ശതമാനം മാത്രമാണ് മുഴുവൻ ഗോതമ്പ് മാവ് ഉണ്ടായിരുന്നതെന്ന് കമ്പനി തന്നെ സമ്മതിച്ചു. “നൂറ് ശതമാനം” എന്നത് കൃത്യവും സമ്പൂർണവുമായ സംഖ്യാ അവകാശവാദമാണെന്നും അതിന് ഏകദേശ അർഥമോ പരസ്യ മുദ്രാവാക്യത്തിന്റെ സ്വഭാവമോ നൽകാനാവില്ലെന്നും അതോറിറ്റി വ്യക്തമാക്കി.

ഉപഭോക്താക്കൾക്ക് ഉൽപ്പന്നത്തിന്റെ യഥാർത്ഥ ഗുണനിലവാരം, അളവ്, ഘടന എന്നിവയെക്കുറിച്ചുള്ള ശരിയായ വിവരം ലഭിക്കാനുള്ള അവകാശം സംരക്ഷിക്കുന്നതിനായാണ് നടപടി സ്വീകരിച്ചത്. ഭക്ഷ്യ പരസ്യങ്ങളിൽ ഘടന, ഗുണമേന്മ, പോഷകമൂല്യം, ആരോഗ്യഗുണങ്ങൾ എന്നിവ സംബന്ധിച്ച എല്ലാ അവകാശവാദങ്ങളും സത്യസന്ധവും പരിശോധിക്കാവുന്നതും വഞ്ചനാപരമല്ലാത്തതുമായിരിക്കണമെന്ന് അതോറിറ്റി വീണ്ടും ഓർമ്മിപ്പിച്ചു. ഉപഭോക്താക്കളെ തെറ്റിദ്ധരിപ്പിക്കുന്ന തരത്തിലുള്ള ഉൽപ്പന്ന അവകാശവാദങ്ങൾക്കെതിരെ തുടർന്നും നടപടി ഉണ്ടാകുമെന്നും അതോറിറ്റി അറിയിച്ചു.

.