തിരുവനന്തപുരം, 2026 ജൂൺ 20 –
കേരളത്തിൽ വീര്യം കുറഞ്ഞ മദ്യത്തിന്റെ വിൽപ്പന ആരംഭിക്കാൻ വഴിയൊരുങ്ങി. മദ്യകമ്പനികളുടെ ആവശ്യം അംഗീകരിച്ച് ഈ വിഭാഗത്തിലെ മദ്യത്തിന് പ്രത്യേക നികുതി ഘടന സർക്കാർ പ്രഖ്യാപിച്ചു. ബജറ്റിലാണ് ‘ലോ ആൽക്കഹോളിക് ബെവറേജസ്’ വിഭാഗത്തിലുള്ള മദ്യത്തിനുള്ള പുതിയ നികുതി നിരക്കുകൾ പ്രഖ്യാപിച്ചത്. ഇതോടെ കേരളത്തിൽ ഈ വിഭാഗത്തിലെ മദ്യങ്ങൾ വിപണിയിലെത്താനുള്ള സാധ്യത വർധിച്ചു.
0.5 ശതമാനം മുതൽ 20 ശതമാനം വരെ ആൽക്കഹോൾ അംശമുള്ള മദ്യങ്ങളാണ് ഈ വിഭാഗത്തിൽ ഉൾപ്പെടുന്നത്. 0.5 മുതൽ 10 ശതമാനം വരെ വീര്യമുള്ള മദ്യത്തിന് 120 ശതമാനവും 10 മുതൽ 20 ശതമാനം വരെ വീര്യമുള്ള മദ്യത്തിന് 175 ശതമാനവും നികുതി നിശ്ചയിച്ചു. നേരത്തെ എൽഡിഎഫ് സർക്കാർ അബ്കാരി നയത്തിൽ വീര്യം കുറഞ്ഞ മദ്യവിൽപ്പന അനുവദിച്ച് ചട്ടഭേദഗതി നടത്തിയിരുന്നെങ്കിലും പ്രത്യേക നികുതി ഘടന പ്രഖ്യാപിച്ചിരുന്നില്ല.
വീര്യം കുറഞ്ഞ മദ്യത്തിനും ഉയർന്ന വീര്യമുള്ള മദ്യത്തിനും ഒരേ നികുതി നൽകേണ്ട സാഹചര്യം ഉണ്ടായിരുന്നതിനാൽ കമ്പനികൾ ഈ ഉൽപ്പന്നങ്ങൾ കേരളത്തിൽ വിപണനം ചെയ്തിരുന്നില്ല. നികുതി ഘടനയിൽ മാറ്റം ആവശ്യപ്പെട്ട് പ്രമുഖ കമ്പനികൾ മുൻ സർക്കാരിനെയും സമീപിച്ചിരുന്നു. എന്നാൽ വരുമാനനഷ്ടം ചൂണ്ടിക്കാട്ടി അന്ന് ആ ആവശ്യം അംഗീകരിച്ചിരുന്നില്ല. പുതിയ നികുതി ഘടനയോടെ വീര്യം കുറഞ്ഞ മദ്യങ്ങളുടെ വിൽപ്പന സംസ്ഥാനത്ത് ആരംഭിക്കുമെന്നാണ് വിലയിരുത്തൽ.
