രാജ്യത്തെ തൊഴിൽ സൃഷ്ടി വേഗത്തിലാക്കുകയും യുവജനങ്ങളെ ശാക്തീകരിക്കുകയും ചെയ്യുന്നതിനായി പ്രധാനമന്ത്രി നരേന്ദ്ര മോദി വികസിത ഭാരത തൊഴിൽ പദ്ധതിയുടെ ഭാഗമായി ഏകദേശം രണ്ടായിരത്തി നാനൂറ് കോടി രൂപയുടെ പ്രോത്സാഹനധനം വിതരണം ചെയ്തു. ഇന്ന് നടന്ന പരിപാടിയിൽ പദ്ധതിയുടെ ഗുണഭോക്താക്കൾ, വ്യവസായ പ്രതിനിധികൾ, മറ്റ് പങ്കാളികൾ എന്നിവർ പങ്കെടുത്തു. ഈ പദ്ധതിയിലൂടെ രാജ്യത്ത് പതിനഞ്ച് ലക്ഷം തൊഴിൽ അവസരങ്ങൾ സൃഷ്ടിക്കപ്പെട്ടതായി അറിയിച്ചു.

പുതുതായി ജോലി ലഭിക്കുന്ന യുവാക്കളെയും തൊഴിൽ സൃഷ്ടിക്കുന്ന സ്ഥാപനങ്ങളെയും ഒരുപോലെ പിന്തുണയ്ക്കുന്നതാണ് ഈ പദ്ധതിയെന്ന് പ്രധാനമന്ത്രി പറഞ്ഞു. ഇതുവരെ ഏകദേശം എഴുപത് ലക്ഷം പുതിയ തൊഴിലവസരങ്ങൾ സൃഷ്ടിക്കപ്പെട്ടതായും അത്രത്തോളം ആദ്യതൊഴിൽ ലഭിച്ചവർ സാമൂഹിക സുരക്ഷാ പരിരക്ഷയുടെ പരിധിയിൽ എത്തിയതായും അദ്ദേഹം വ്യക്തമാക്കി. ഇരുപത് ലക്ഷം യുവാക്കൾ ആദ്യ ജോലിയിൽ ആറുമാസം പൂർത്തിയാക്കിയതായും പത്ത് ലക്ഷം ഗുണഭോക്താക്കൾക്ക് ഇതിനകം പ്രോത്സാഹനധനം ലഭിച്ചതായും അദ്ദേഹം പറഞ്ഞു. രണ്ടായിരം കോടിയിലധികം രൂപ നേരിട്ട് ഗുണഭോക്താക്കളുടെ ബാങ്ക് അക്കൗണ്ടുകളിലേക്ക് കൈമാറിയതായും വ്യക്തമാക്കി.

കഴിഞ്ഞ പന്ത്രണ്ട് വർഷത്തിനിടെ തൊഴിൽ വർധിപ്പിക്കാൻ അടിസ്ഥാനസൗകര്യ വികസനം, ഉൽപ്പാദനം, ഡിജിറ്റൽ സമ്പദ്‌വ്യവസ്ഥ, ബഹിരാകാശ സാങ്കേതികവിദ്യ, നവസംരംഭങ്ങൾ തുടങ്ങിയ മേഖലകളിൽ സർക്കാർ ശ്രദ്ധ കേന്ദ്രീകരിച്ചതായി പ്രധാനമന്ത്രി പറഞ്ഞു. ഇപ്പോൾ രാജ്യത്ത് രണ്ടുലക്ഷത്തിലധികം രജിസ്റ്റർ ചെയ്ത നവസംരംഭങ്ങൾ പ്രവർത്തിക്കുന്നുണ്ടെന്നും അദ്ദേഹം ചൂണ്ടിക്കാട്ടി. ഭാവിയിലെ സമ്പദ്‌വ്യവസ്ഥയെ നയിക്കാൻ ആവശ്യമായ കഴിവുകളും അവസരങ്ങളും യുവാക്കൾക്ക് നൽകുകയാണ് ലക്ഷ്യമെന്നും വികസിത രാഷ്ട്രമാകാനുള്ള ഇന്ത്യയുടെ യാത്രയിൽ യുവജനങ്ങളുടെ പങ്ക് നിർണായകമാണെന്നും അദ്ദേഹം വ്യക്തമാക്കി.