കോഴിക്കോട്, 2026 ജൂൺ 18 –

കാഫിർ സ്‌ക്രീൻഷോട്ട് കേസിലെ പ്രതിയും ഡിവൈഎഫ്‌ഐ നേതാവുമായ ജിതിൻ ഭാസ്‌കറിന്റെ ജാമ്യാപേക്ഷ വടകര സെഷൻസ് കോടതി തള്ളി. കേസിൽ കൂടുതൽ അന്വേഷണം ആവശ്യമാണെന്ന് വിലയിരുത്തിയ കോടതി ജിതിനെ രണ്ട് ദിവസത്തേക്ക് പൊലീസ് കസ്റ്റഡിയിൽ വിട്ടു. ശനിയാഴ്ച വൈകിട്ട് അഞ്ച് മണിവരെയാണ് കസ്റ്റഡി കാലാവധി.

കേസിലെ പ്രധാന തെളിവുകൾ നശിപ്പിക്കപ്പെട്ടതായി റിമാൻഡ് റിപ്പോർട്ടിൽ പറയുന്നു. ജിതിന്റെ മൊബൈൽ ഫോൺ ഫാക്ടറി റീസെറ്റ് ചെയ്തതിനാൽ ഡാറ്റ വീണ്ടെടുക്കാൻ ജില്ലാ ഫോറൻസിക് വിഭാഗത്തിന് കഴിഞ്ഞില്ലെന്നാണ് റിപ്പോർട്ട്. ഇതിനെ തുടർന്ന് ഫോൺ സംസ്ഥാന ഫോറൻസിക് വിഭാഗത്തിന് അയയ്ക്കണമെന്നാണ് അന്വേഷണസംഘത്തിന്റെ ആവശ്യം. സ്‌ക്രീൻഷോട്ട് തയ്യാറാക്കാൻ ഉപയോഗിച്ചതായി കരുതുന്ന ഫോണാണിതെന്നും തെളിവ് നശിപ്പിക്കാൻ ശ്രമം നടന്നതായും റിമാൻഡ് റിപ്പോർട്ടിൽ ചൂണ്ടിക്കാട്ടുന്നു.

ഡിജിറ്റൽ തെളിവുകളുടെ അടിസ്ഥാനത്തിലാണ് പ്രത്യേക അന്വേഷണസംഘം ജിതിൻ ഭാസ്‌കറിലേക്ക് എത്തിയത്. കാഫിർ സ്‌ക്രീൻഷോട്ട് വ്യക്തികൾക്കും വിവിധ ഗ്രൂപ്പുകളിലേക്കും ജിതിൻ പ്രചരിപ്പിച്ചതായി കണ്ടെത്തിയിട്ടുണ്ട്. ഏകദേശം 200 ഓളം ഗ്രൂപ്പുകളിലേക്ക് സ്‌ക്രീൻഷോട്ട് പങ്കുവെച്ചതായും അന്വേഷണസംഘം പറയുന്നു. ആദ്യം ‘വടകര സ്‌ക്വാഡ്’ എന്ന വാട്സ്ആപ്പ് ഗ്രൂപ്പിലും പിന്നീട് ‘റെഡ് എൻകൗണ്ടർ’ എന്ന ഗ്രൂപ്പിലും സ്‌ക്രീൻഷോട്ട് പ്രചരിപ്പിച്ചതായാണ് അന്വേഷണ നിഗമനം.