രാജ്യത്തെ ഹരിത ഹൈഡ്രജൻ മേഖലയിലെ സുതാര്യതയും നിയന്ത്രണാനുസരണവും ശക്തിപ്പെടുത്താൻ ഹരിത ഹൈഡ്രജൻ സർട്ടിഫിക്കേഷൻ പോർട്ടൽ കേന്ദ്ര സർക്കാർ ആരംഭിച്ചു. നവീന-പുനരുപയോഗ ഊർജ മന്ത്രാലയം സംഘടിപ്പിച്ച ദേശീയ ശിൽപ്പശാലയിൽ കേന്ദ്രമന്ത്രി പ്രഹ്ലാദ് ജോഷിയാണ് പോർട്ടൽ ഉദ്ഘാടനം ചെയ്തത്. ദേശീയ ഹരിത ഹൈഡ്രജൻ ദൗത്യം ശക്തിപ്പെടുത്തുക എന്ന ലക്ഷ്യത്തോടെയാണ് നടപടി.

നവീന-പുനരുപയോഗ ഊർജ മന്ത്രാലയം വികസിപ്പിച്ച പോർട്ടൽ, ഹരിത ഹൈഡ്രജൻ സർട്ടിഫിക്കേഷൻ പദ്ധതിയുടെ ഭാഗമായി സുതാര്യമായ സർട്ടിഫിക്കേഷനും നിയന്ത്രണാനുസരണവും ഉറപ്പാക്കും. ആറ് സംസ്ഥാനങ്ങൾ ഇതിനകം പ്രത്യേക ഹരിത ഹൈഡ്രജൻ നയങ്ങൾ പ്രഖ്യാപിച്ചിട്ടുണ്ടെന്നും ഏഴ് സംസ്ഥാനങ്ങൾ നിലവിലെ വ്യവസായ-പുനരുപയോഗ ഊർജ നയങ്ങളിൽ ഹൈഡ്രജനെ ഉൾപ്പെടുത്തിയിട്ടുണ്ടെന്നും മന്ത്രി അറിയിച്ചു. നാല് സംസ്ഥാനങ്ങൾ കൂടി നയങ്ങൾ അന്തിമമാക്കുന്ന ഘട്ടത്തിലാണെന്നും അദ്ദേഹം പറഞ്ഞു. ആഭ്യന്തര നിർമാണശേഷി വർധിപ്പിക്കാൻ പതിനഞ്ച് കമ്പനികൾക്ക് സാമ്പത്തിക പ്രോത്സാഹനവും അനുവദിച്ചിട്ടുണ്ട്.

രണ്ടായിരത്തി ഇരുപത്തിമൂന്നിൽ ആരംഭിച്ച ദേശീയ ഹരിത ഹൈഡ്രജൻ ദൗത്യം രാജ്യത്തിന്റെ ശുദ്ധ ഊർജ പരിവർത്തനത്തിന് വലിയ പിന്തുണ നൽകുന്നതായും മന്ത്രി വ്യക്തമാക്കി. അഞ്ച് ദശലക്ഷം മെട്രിക് ടൺ ഹരിത ഹൈഡ്രജൻ ഉൽപാദനശേഷി സൃഷ്ടിക്കുക, വലിയ നിക്ഷേപം ആകർഷിക്കുക, ആറുലക്ഷത്തിലധികം തൊഴിലവസരങ്ങൾ ഉണ്ടാക്കുക, കാർബൺ പുറന്തള്ളൽ കുറയ്ക്കുക എന്നിവയാണ് ദൗത്യത്തിന്റെ ലക്ഷ്യം. ഹരിത ഹൈഡ്രജൻ സാങ്കേതികവിദ്യകളിൽ പ്രവർത്തിക്കുന്ന പുതുസംരംഭങ്ങൾക്ക് നൂറ് കോടി രൂപ പിന്തുണയായി വകയിരുത്തിയതായും ആദ്യഘട്ടത്തിൽ ഒൻപത് പുതുസംരംഭങ്ങൾക്ക് ഇരുപത്തിരണ്ട് കോടി രൂപ അനുവദിക്കുമെന്നും മന്ത്രി പ്രഖ്യാപിച്ചു.

.