തുറവൂർ, 2026 ജൂൺ 15 –
കൊല്ലത്ത് നഴ്സിങ് വിദ്യാർഥിനി ദുരൂഹ സാഹചര്യത്തിൽ മരിച്ച സംഭവത്തിലെ അന്വേഷണം സംസ്ഥാന ക്രൈംബ്രാഞ്ച് ഏറ്റെടുത്തു. തുറവൂർ പഞ്ചായത്ത് പതിനേഴാം വാർഡ് പള്ളിത്തോട് പടിഞ്ഞാറേ മനക്കോടം പാല്ല്യത്തൈയ്യിൽ സാജൻ ആന്റണിയുടെ മകൾ ഫെബിന സാജൻ (23) മരിച്ച സംഭവമാണ് ക്രൈംബ്രാഞ്ച് അന്വേഷിക്കുന്നത്. കൊല്ലം ബെൻസിഗർ നഴ്സിങ് കോളേജിലെ വിദ്യാർഥിനിയായിരുന്ന ഫെബിനയെ പരീക്ഷയ്ക്കായി കൊട്ടിയത്തെ ബന്ധുവീട്ടിൽ താമസിക്കുന്നതിനിടെ കഴിഞ്ഞ ജനുവരി 18നാണ് മരിച്ച നിലയിൽ കണ്ടെത്തിയത്.
മരണത്തിൽ ദുരൂഹതയുണ്ടെന്ന് ആരോപിച്ച് മാതാപിതാക്കൾ മുഖ്യമന്ത്രിക്കും ആഭ്യന്തര മന്ത്രിക്കും പരാതി നൽകിയതിനെ തുടർന്നാണ് കേസ് ക്രൈംബ്രാഞ്ചിന് കൈമാറിയത്. മഹാരാഷ്ട്ര സ്വദേശിയും നിലവിൽ കൊല്ലത്ത് സ്വർണക്കട നടത്തുന്ന പ്രതീപ് എന്നയാളിൽ നിന്ന് ഫെബിനയ്ക്ക് നിരന്തര പീഡനവും ഭീഷണിയും നേരിട്ടിരുന്നതായി ബന്ധുക്കൾ ആരോപിക്കുന്നു. ഇയാൾ മുൻപ് പലതവണ കൊലപ്പെടുത്താൻ ശ്രമിച്ചിരുന്നതായും പരാതിയിൽ പറയുന്നു. പ്രതീപിന്റെ ശല്യം കാരണം പഠനം അവസാനിപ്പിച്ചിരുന്ന ഫെബിന പരീക്ഷ എഴുതാൻ മാത്രമായി കൊല്ലത്ത് എത്തിയപ്പോഴാണ് മരണം സംഭവിച്ചതെന്നും കുടുംബം പറയുന്നു.
മാതാപിതാക്കൾ എത്തുന്നതിന് മുമ്പ് പോസ്റ്റ്മോർട്ടം ഉൾപ്പെടെയുള്ള നടപടികൾ തിടുക്കത്തിൽ പൂർത്തിയാക്കിയതും മൃതദേഹത്തിൽ മുട്ടുസൂചി കൊണ്ട് കുത്തിയ പാടുകൾ ഉണ്ടായിരുന്നതായുള്ള ആരോപണങ്ങളും ദുരൂഹത വർധിപ്പിച്ചു. മാതാപിതാക്കളുടെ പരാതിയെ തുടർന്ന് നടത്തിയ അന്വേഷണത്തിൽ ഫെബിനയുടെ മരണത്തിൽ അസ്വാഭാവികതയുണ്ടെന്നും കൊട്ടിയം പൊലീസിന്റെ ഭാഗത്ത് ഗുരുതര വീഴ്ച സംഭവിച്ചെന്നും കേസ് അട്ടിമറിക്കാൻ ശ്രമമുണ്ടായെന്നുമുള്ള കണ്ടെത്തലുകൾ പുറത്തുവന്നു. ഇതിനെ തുടർന്നാണ് സംസ്ഥാന ക്രൈംബ്രാഞ്ച് തുടരന്വേഷണത്തിന് ഉത്തരവിട്ടത്.
