എം.വി. ഗോവിന്ദന്റെ പേരിൽ വ്യാജ പ്രചാരണം; പൊലീസിൽ പരാതി

കൊച്ചി, 2026 ജൂൺ 15 –

കെഎസ്ആർടിസിയിലെ വനിതകളുടെ സൗജന്യ യാത്രാ പദ്ധതിയുമായി ബന്ധപ്പെട്ട് സിപിഐഎം സംസ്ഥാന സെക്രട്ടറി എം.വി. ഗോവിന്ദൻ മാസ്റ്ററുടെ പേരിൽ വ്യാജ പ്രചാരണം നടന്നതായി പരാതി. സിപിഐഎം വനിതകൾ സൗജന്യ യാത്ര സ്വീകരിക്കില്ലെന്നും പണം നൽകി യാത്ര ചെയ്യുമെന്നുമുള്ള പ്രസ്താവന എം.വി. ഗോവിന്ദൻ നടത്തിയതായി കാണിച്ച് സമൂഹമാധ്യമങ്ങളിൽ കാർഡുകൾ പ്രചരിക്കുകയായിരുന്നു. സംഭവത്തിൽ അഡ്വ. കെ.എസ്. അരുണ്‍ കുമാർ എറണാകുളം സെൻട്രൽ പൊലീസിൽ പരാതി നൽകി.

കവിത സുരേഷ്, ടോമി വൈരനാണിക്കൽ, ജിൻസ് എന്നീ പ്രൊഫൈലുകൾക്കെതിരെയാണ് പരാതി നൽകിയിരിക്കുന്നത്. എം.വി. ഗോവിന്ദന്റെ പേരിൽ പ്രചരിക്കുന്ന കാർഡുകൾ വ്യാജമാണെന്നും അവ സമൂഹമാധ്യമങ്ങളിൽ പ്രചരിക്കുന്നത് തടയണമെന്നും പരാതിയിൽ ആവശ്യപ്പെട്ടിട്ടുണ്ട്.

അതേസമയം, സ്ത്രീകൾക്ക് കെഎസ്ആർടിസി ഓർഡിനറി ബസുകളിൽ സൗജന്യ യാത്ര അനുവദിക്കുന്ന പ്രിയദർശിനി പദ്ധതി ഇന്നലെ മുതൽ നടപ്പിലായി. മുഖ്യമന്ത്രി വി.ഡി. സതീശൻ തിരുവനന്തപുരം പാപ്പനംകോഡ് ഡിപ്പോയിൽ പദ്ധതി ഉദ്ഘാടനം ചെയ്തു. സ്ത്രീകൾക്കും ട്രാൻസ്ജെൻഡർ വ്യക്തികൾക്കും തിരിച്ചറിയൽ കാർഡോ രജിസ്ട്രേഷനോ ഇല്ലാതെ സൗജന്യ യാത്ര ലഭിക്കും. പദ്ധതിയിൽ ഉൾപ്പെട്ട ബസുകളിൽ പ്രത്യേക തിരിച്ചറിയൽ ബോർഡുകളും സ്ഥാപിച്ചിട്ടുണ്ട്.