ലോകകപ്പില്‍ വംശീയ വിവാദം; വാർ റഫറിയുടെ കൈയാംഗ്യത്തിനെതിരെ പ്രതിഷേധം ശക്തം

ലാസ് വെഗാസ്, 2026 ജൂണ്‍ 15 –

ഫിഫ ലോകകപ്പിലെ ജര്‍മ്മനി – ക്യൂറസാവ് ഗ്രൂപ്പ് ഇ മത്സരത്തിനിടെ വാർ റഫറിയുടെ കൈയാംഗ്യം വന്‍ വിവാദത്തിന് വഴിവെച്ചു. മത്സരത്തിന് മുമ്പ് ഒഫീഷ്യലുകളെ പ്രേക്ഷകര്‍ക്ക് പരിചയപ്പെടുത്തുന്നതിനിടെയാണ് വാർ ചുമതലയിലുണ്ടായിരുന്ന ഓസ്‌ട്രേലിയന്‍ റഫറി Shawn Evans ക്യാമറയ്ക്ക് നേരെ കൈകൊണ്ട് ഒ.കെ ചിഹ്നം കാണിച്ചത്. ഇതിനെതിരെ സമൂഹമാധ്യമങ്ങളില്‍ വ്യാപക വിമര്‍ശനമാണ് ഉയർന്നത്.

റഫറി കാണിച്ച ആംഗ്യം തീവ്ര വലതുപക്ഷ വംശീയ ഗ്രൂപ്പുകള്‍ ഉപയോഗിക്കുന്ന “വൈറ്റ് പവര്‍” ചിഹ്നമാണെന്ന് ആരോപിച്ചാണ് ഫുട്ബോള്‍ ആരാധകര്‍ രംഗത്തെത്തിയത്. വിവേചനത്തിനെതിരെ പ്രവര്‍ത്തിക്കുന്ന ഫെയര്‍ നെറ്റവർക്ക് വിഷയത്തില്‍ കടുത്ത പ്രതികരണം നടത്തി. റഫറിയെ ലോകകപ്പ് പാനലില്‍നിന്ന് ഉടന്‍ പുറത്താക്കണമെന്ന് സംഘടന ഫിഫയോട് ആവശ്യപ്പെട്ടു. കോടിക്കണക്കിന് ആളുകള്‍ കാണുന്ന തത്സമയ സംപ്രേഷണത്തിനിടെ ഇത്തരമൊരു ചിഹ്നം കാണിച്ചത് മനഃപൂര്‍വമായ നടപടിയാണെന്നും സംഘടന ആരോപിച്ചു.

വിവാദം ശക്തമായതോടെ തുടര്‍ന്ന് നടന്ന മത്സരങ്ങളുടെ തത്സമയ സംപ്രേഷണത്തില്‍ റഫറിമാരുടെ പാനലിനെ പ്രേക്ഷകര്‍ക്ക് പരിചയപ്പെടുത്തുന്ന രീതി ഒഴിവാക്കിയതായും റിപ്പോര്‍ട്ടുകളുണ്ട്. സംഭവത്തില്‍ ഫിഫയുടെ ഭാഗത്തുനിന്നുള്ള ഔദ്യോഗിക പ്രതികരണം സംബന്ധിച്ച് വിവരമില്ല.