പശ്ചിമ ബംഗാൾ സർക്കാർ നാളെ ആയുഷ്മാൻ ഭാരത് പ്രധാനമന്ത്രി ജന ആരോഗ്യ യോജന പദ്ധതിയിൽ ചേരാനൊരുങ്ങുന്നു. ഇതുമായി ബന്ധപ്പെട്ട ധാരണാപത്രം ദേശീയ ആരോഗ്യ അതോറിറ്റിയും പശ്ചിമ ബംഗാൾ ആരോഗ്യ-കുടുംബക്ഷേമ വകുപ്പും തമ്മിൽ ന്യൂഡൽഹിയിലെ വിജ്ഞാൻ ഭവനിൽ ഒപ്പിടും. ഇതോടെ പദ്ധതി നടപ്പാക്കുന്ന രാജ്യത്തെ 36-ാമത്തെ സംസ്ഥാനമോ കേന്ദ്രഭരണ പ്രദേശമോ ആയി പശ്ചിമ ബംഗാൾ മാറും.

കേന്ദ്ര ആരോഗ്യ-കുടുംബക്ഷേമ മന്ത്രി ജെ.പി. നഡ്ഡയുടെ അധ്യക്ഷതയിൽ നടക്കുന്ന ചടങ്ങിലാണ് ധാരണാപത്രം ഒപ്പിടുന്നത്. പശ്ചിമ ബംഗാൾ മുഖ്യമന്ത്രി സുവേന്ദു അധികാരി, കേന്ദ്ര സഹമന്ത്രിമാർ, കേന്ദ്ര ആരോഗ്യ സെക്രട്ടറി, പശ്ചിമ ബംഗാൾ ചീഫ് സെക്രട്ടറി എന്നിവരും മറ്റ് ഉന്നത ഉദ്യോഗസ്ഥരും ചടങ്ങിൽ പങ്കെടുക്കും. എല്ലാ പൗരന്മാർക്കും തുല്യവും എളുപ്പത്തിൽ ലഭ്യമാകുന്നതുമായ ആരോഗ്യ സേവനം ഉറപ്പാക്കുന്നതിനുള്ള വലിയ മുന്നേറ്റമായാണ് ഈ തീരുമാനം വിലയിരുത്തപ്പെടുന്നത്.

ഒരു കുടുംബത്തിന് പ്രതിവർഷം അഞ്ച് ലക്ഷം രൂപ വരെ ചികിത്സാ പരിരക്ഷ നൽകുന്ന പദ്ധതിയാണ് ആയുഷ്മാൻ ഭാരത് പ്രധാനമന്ത്രി ജന ആരോഗ്യ യോജന. . പദ്ധതി ആരംഭിച്ചതിന് ശേഷം ചികിത്സാച്ചെലവിന്റെ സാമ്പത്തികഭാരം കുറയ്ക്കാനും മികച്ച ചികിത്സാ സേവനങ്ങളിലേക്കുള്ള പ്രവേശനം വർധിപ്പിക്കാനും ഇത് സഹായിച്ചതായി വിലയിരുത്തപ്പെടുന്നു. പശ്ചിമ ബംഗാളിൽ പദ്ധതി നടപ്പാകുന്നതോടെ ലക്ഷക്കണക്കിന് അർഹരായ ഗുണഭോക്താക്കൾക്ക് ആരോഗ്യച്ചെലവുകളിൽ നിന്ന് സാമ്പത്തിക സംരക്ഷണം ലഭിക്കുമെന്നും രാജ്യത്തിന്റെ ഏത് ഭാഗത്തും ആരോഗ്യാനുകൂല്യങ്ങൾ ഉപയോഗിക്കാനാകുമെന്നും പ്രതീക്ഷിക്കുന്നു. സംസ്ഥാനത്തെ ആരോഗ്യ സംവിധാനവും ഇതിലൂടെ കൂടുതൽ ശക്തിപ്പെടുമെന്നാണ് വിലയിരുത്തൽ.