ബന്ധുനിയമന വിവാദം: മന്ത്രി സണ്ണി ജോസഫിന്റെ സഹോദരീഭർത്താവ് ബെെന്നി തോമസ് രാജിവച്ചു

തിരുവനന്തപുരം, 2026 ജൂൺ 7 –

മന്ത്രി സണ്ണി ജോസഫിന്റെ പേഴ്സണൽ സ്റ്റാഫായി നിയമിക്കപ്പെട്ടിരുന്ന സഹോദരീഭർത്താവ് ബെെന്നി തോമസ് രാജിവച്ചു. ബന്ധുനിയമനം വിവാദമായതിന് പിന്നാലെയാണ് നടപടി. ബെെന്നി തോമസ് തന്റെ രാജിക്കത്ത് മുഖ്യമന്ത്രി വി.ഡി. സതീശന് കൈമാറി.

സണ്ണി ജോസഫിന്റെ അഡീഷണൽ പ്രൈവറ്റ് സെക്രട്ടറിയായാണ് ബെെന്നി തോമസിനെ നിയമിച്ചിരുന്നത്. ഈ നിയമനത്തിനെതിരെ കെപിസിസി യോഗത്തിൽ കടുത്ത വിമർശനം ഉയർന്നിരുന്നു. പേഴ്സണൽ സ്റ്റാഫ് നിയമനത്തിൽ കൂടുതൽ കരുതൽ വേണമായിരുന്നുവെന്നും വിവാദങ്ങൾക്ക് ഇട നൽകാൻ പാടില്ലായിരുന്നുവെന്നുമായിരുന്നു വിമർശനം. എന്നാൽ ബെെന്നിയെ ഉൾപ്പെടുത്തിയത് സഹോദരിയുടെ ഭർത്താവായതുകൊണ്ടല്ലെന്നും, അദ്ദേഹം നല്ലൊരു പൊതുപ്രവർത്തകനാണെന്നുമാണ് സണ്ണി ജോസഫ് വിശദീകരിച്ചത്.

വിവാദം ശക്തമായതോടെ വിഷയത്തിൽ പ്രതികരിച്ച മുഖ്യമന്ത്രി വി.ഡി. സതീശൻ, കാര്യം തന്റെ ശ്രദ്ധയിൽപ്പെട്ടിട്ടുണ്ടെന്നും പരിശോധിച്ച ശേഷം പ്രതികരിക്കാമെന്നും പറഞ്ഞിരുന്നു. അതിന് പിന്നാലെയാണ് ബെെന്നി തോമസ് രാജി സമർപ്പിച്ചത്. ബന്ധുനിയമന വിവാദം ഉയർന്ന സാഹചര്യത്തിൽ ഉണ്ടായ ഈ രാജി രാഷ്ട്രീയ ചർച്ചകൾക്ക് കൂടുതൽ വഴിവെച്ചിരിക്കുകയാണ്.