തെഹ്റാൻ
ഇറാന്റെ ഊർജ അടിസ്ഥാനസൗകര്യങ്ങളെ ആക്രമിച്ചാൽ പശ്ചിമേഷ്യയിലെ അമേരിക്കൻ കമ്പനികളുടെ സ്ഥാപനങ്ങളെ ലക്ഷ്യമിട്ട് പ്രതികാര ആക്രമണം നടത്തുമെന്ന് ഇറാൻ വിദേശകാര്യ മന്ത്രി അബ്ബാസ് അറാഖ്ചി മുന്നറിയിപ്പ് നൽകി. അമേരിക്കയുമായി ബന്ധമുള്ള കമ്പനികളുടെ സ്ഥാപനങ്ങളും ലക്ഷ്യമാകാമെന്നും അദ്ദേഹം പറഞ്ഞു.
വൈസിജെ വാർത്താ ഏജൻസിയോട് നടത്തിയ പ്രസ്താവനയിലാണ് അറാഖ്ചി ഈ മുന്നറിയിപ്പ് നൽകിയത്. ഇറാന്റെ എണ്ണയോ ഊർജ അടിസ്ഥാന സൗകര്യങ്ങളോ ആക്രമിക്കപ്പെടുകയാണെങ്കിൽ അതിന് സമാനമായ രീതിയിൽ പ്രതികരിക്കുമെന്നും അദ്ദേഹം വ്യക്തമാക്കി.
അമേരിക്കയുടെ ഓഹരി പങ്കാളിത്തമുള്ള കമ്പനികളുടെ സ്ഥാപനങ്ങളും ഇറാന്റെ സൈനിക ലക്ഷ്യങ്ങളായി മാറാമെന്ന് അറാഖ്ചി പറഞ്ഞു. എന്നാൽ പ്രതികാര ആക്രമണങ്ങൾ നടത്തുമ്പോൾ ജനസാന്ദ്രമായ പ്രദേശങ്ങളെ ലക്ഷ്യമിടാതിരിക്കാനുള്ള ജാഗ്രത പാലിക്കുമെന്നും അദ്ദേഹം കൂട്ടിച്ചേർത്തു.
മുൻകാലങ്ങളിലും ഇറാൻ അമേരിക്കൻ കമ്പനികളുടെ സാമ്പത്തിക താൽപ്പര്യങ്ങളെ ലക്ഷ്യമാക്കി പ്രതികാര നടപടികൾ സ്വീകരിക്കുമെന്ന് മുന്നറിയിപ്പ് നൽകിയിട്ടുണ്ട്. പ്രത്യേകിച്ച് ഇറാനെതിരായ ഉപരോധങ്ങളും സൈനിക സമ്മർദ്ദങ്ങളും ശക്തമായ സമയങ്ങളിൽ ഇത്തരം മുന്നറിയിപ്പുകൾ ഉണ്ടായിട്ടുണ്ട്
