ട്രിനിഡാഡ്: ഇന്ത്യ-വെസ്റ്റ് ഇന്ഡീസ് ഏകദിന പരമ്പരയിലെ മൂന്നാമത്തെയും അവസാനത്തെയും ഏകദിനം ഇന്ന്. ട്രിനിഡാഡിലെ ബ്രയാന് ലാറ സ്റ്റേഡിയത്തില് ഇന്ത്യന് സമയം രാത്രി ഏഴിനാണ് മത്സരം തുടങ്ങുക. രണ്ടാം ഏകദിനത്തില് പരാജയപ്പെട്ട സഞ്ജു സാംസണും സൂര്യകുമാര് യാദവിനും ഇന്ന് അവസരം നല്കുമോ എന്നാണ് ഏവരും ഉറ്റുനോക്കുന്നത്.
രണ്ടാം ഏകദിനത്തിലെ ബാറ്റിങ് പരീക്ഷണം അമ്പേ പാളിയ പശ്ചാത്തലത്തില് ഇന്ത്യ യഥാര്ത്ഥ ഇലവനുമായി ഇന്നു കളിക്കാനിറങ്ങും. ക്യാപ്റ്റനായി രോഹിത് ശര്മയും മുന് നായകന് വിരാട് കോലിയും മൂന്നാം ഏകദിനത്തില് തിരിച്ചെത്തും. രോഹിത് തിരിച്ചെത്തിയാല് ശുഭ്മാന് ഗില്ലിനൊപ്പം ഓപ്പണറായി ഇറങ്ങാനാണ് സാധ്യത. ആദ്യ രണ്ട് ഏകദിനങ്ങളിലും അര്ധസെഞ്ചുറിയുമായി തിളങ്ങിയ വിക്കറ്റ് കീപ്പര് ബാറ്റര് ഇഷാന് കിഷന് വിശ്രമം അനുവദിച്ചാല് സഞ്ജുവിന് ഒരവസരം കൂടി ലഭിക്കും. മൂന്നാം നമ്പറില് വിരാട് കോലിയും കിഷന് വിശ്രമം അനുവദിച്ചാല് സഞ്ജു സാംസണ് നാലാം നമ്പറിലാവും ഇറങ്ങുക. കിഷന് ഇന്നു കളിച്ചാല് സഞ്ജുവിന് പുറത്തിരിക്കേണ്ടിവരും.
തോറ്റാല് ലോകകപ്പിന് യോഗ്യത നേടാത്ത വിന്ഡീസിന് മുമ്പില് ഏകദിന പരമ്പര നഷ്ടപ്പെടുത്തുന്നത് നാണക്കേടുണ്ടാക്കും. അതുകൊണ്ടുതന്നെ കൂടുതല് പരീക്ഷണങ്ങള്ക്ക് ഇന്ത്യ മുതിരില്ലെന്നാണ് കരുതുന്നത്. സൂര്യകുമാര് യാദവിന് അവസാന അവസരമെന്ന നിലയില് മൂന്നാം ഏകദിനത്തിലും പ്ലേയിംഗ് ഇലവനില് ഇടം നല്കിയേക്കും. ഹാര്ദ്ദിക് പാണ്ഡ്യ ആറാം നമ്പറില് ഇറങ്ങുമ്പോള് അക്സര് പട്ടേലിന് ഒരവസരം കൂടി നല്കും. അങ്ങനെ വന്നാല്, രവീന്ദ്ര ജഡേജയ്ക്ക് വിശ്രമം നല്കും.
ഷാര്ദ്ദുല് താക്കൂര് പേസ് ഓള് റൗണ്ടറായി ടീമില് തുടരും. കുല്ദീപ് യാദവിന് പകരം യുസ്വേന്ദ്ര ചാഹലുംഇന്ന് പ്ലേയിംഗ് ഇലവനില് കളിക്കാനുള്ള സാധ്യതയുണ്ട്. മുകേഷ് കുമാറും ഉമ്രാന് മാലിക്കുമായിരിക്കും ടീമിലെ മറ്റ് രണ്ട് പേസര്മാര്.ഷായി ഹോപ്പ് നയിക്കുന്ന വെസ്റ്റ് ഇന്ഡീസ് ടീമില് മാറ്റങ്ങളൊന്നുമില്ലാതെയാകും ഇന്നിറങ്ങുക.
