കണ്ണൂര്: എട്ടാം ക്ലാസുകാരി ജീവനൊടുക്കിയ സംഭവത്തില് രണ്ടു അധ്യാപകര്ക്കെതിരേ പോലീസ് കേസെടുത്തു. പെരളശ്ശേരി എ.കെ.ജി. ഗവ. ഹയര്സെക്കന്ഡറി സ്കൂളിലെ വിദ്യാര്ഥിനി റിയ പ്രവീണിന്റെ മരണത്തിലാണ് ക്ലാസ് അധ്യാപിക സോജ, കായികാധ്യാപകന് രാഗേഷ് എന്നിവര്ക്കെതിരെ കേസെടുത്തത്. കഴിഞ്ഞ വ്യാഴാചയാണ് പെണ്കുട്ടിയെ വീട്ടില് ജീവനൊടുക്കിയ നിലയില് കണ്ടെത്തിയത്. മാനസിക സമ്മര്ദ്ദത്തിലാക്കുന്ന തരത്തില് അധ്യാപകര് അധിക്ഷേപിച്ചതനാലാണ് കുട്ടി ആത്മഹത്യ ചെയ്തതെന്ന് ചക്കരക്കല് പോലീസ് കോടതിയില് സമര്പ്പിച്ച റിപ്പോര്ട്ടില് പറയുന്നു.
വിദ്യാര്ഥിനിയുടെ ആത്മഹത്യാക്കുറിപ്പും പോലീസ് കണ്ടെടുത്തിരുന്നു. സ്കൂളിലെ അധ്യാപകര്ക്കെതിരേയാണ് കുറിപ്പില് പരാമര്ശമുണ്ടായിരുന്നത്. ആത്മഹത്യാപ്രേരണാക്കുറ്റമാണ് രണ്ടുപേര്ക്കും എതിരേ ചുമത്തിയിരിക്കുന്നത്.
റിയ ഡെസ്കിലും ചുമരിലും മഷി ആക്കിയതില് പിഴയായി ഇരുപത്തി അയ്യായിരം രൂപ നല്കണമെന്ന് അധ്യാപകര് ആവശ്യപ്പെട്ടതായി സഹപാഠി വെളിപ്പെടുത്തിയിരുന്നു.
അന്വേഷണത്തിന്റെ ഭാഗമായി അധ്യാപകര് ഉള്പ്പെടെയുള്ളവരുടെ മൊഴി പോലീസ് രേഖപ്പെടുത്തിയിരുന്നു. തുടര്ന്നാണ് രണ്ട് അധ്യാപകര്ക്കെതിരേ ആത്മഹത്യാ പ്രേരണാക്കുറ്റം ചുമത്താന് തീരുമാനിച്ചത്. സംഭവത്തില് സംസ്ഥാന ബാലാവകാശ സംരക്ഷണ കമ്മിഷന് പോലീസിനോട് റിപ്പോര്ട്ട് തേടിയിരുന്നു. കമ്മിഷന് ചെയര്പേഴ്സണ് കെ.വി.മനോജ് കുമാര് സ്കൂളും വിദ്യാര്ഥിയുടെ വീടും സന്ദര്ശിക്കുകയും ചെയ്തു.
