പൂനെ : സിആര്‍പിഎഫ്‌ ക്യാമ്പിലെ ഇന്‍സ്റ്റിറ്റിയൂട്ട്‌ ഓഫ്‌ ഐഇഡി മാനേജ്‌മെന്റില്‍ നടന്ന സ്‌ഫോടക വസ്‌തു നിര്‍വീര്യമാക്കല്‍ പരിശീലനത്തില്‍ കേരള പോലീസ്‌ തണ്ടര്‍ ബോള്‍ട്ടു വിഭാഗം ഒന്നാം സ്ഥാനം കരസ്ഥമാക്കി. ആറാഴ്‌ച നീണ്ട പരിശീലനത്തില്‍കൗണ്ടര്‍ ഐഇഡി കോഴ്‌സിനാണ്‌ കേരളാ പോലീസ്‌ തണ്ടര്‍ബോള്‍ട്ട്‌ ഓവര്‍ ഓള്‍ ട്രോഫി നേടിയത്‌. പ്രത്യേക വൈദഗ്‌ധ്യം വേണ്ട ഉപകരണങ്ങല്‍ കൈകാര്യം ചെയ്യുന്ന വിഭാഗത്തില്‍ തണ്ടര്‍ ബോള്‍ട്ട്‌ കമന്‍ഡോ സന്ദീപ്‌ രവി ഒന്നാം സ്ഥാനവും മൊത്തം മികവിന്റെ അടിസ്ഥാനത്തില്‍ മൂന്നാം സ്ഥാനവും നേടി മികച്ച കേഡറ്റ്‌ ആയി തെരഞ്ഞെടുക്കപ്പെട്ടു.
ഇന്ത്യ റിസര്‍വ്‌ ബെറ്റാലിയന്‌ പുറമേ എന്‍.എസ്‌.ജി, എസ്‌എസ്‌ബി, സി.ആര്‍.പി.എഫ്‌, കോബ്രാ എന്നീ വിഭാഗങ്ങളില്‍ നിന്നായി 114 കേഡറ്റുകള്‍ പങ്കെടുത്ത കോഴ്‌സിലാണ്‌ കേരള പോലീസ്‌ ഓവര്‍ ഓള്‍ ട്രോഫി സ്വന്തമാക്കിയത്‌.
