ന്യൂഡൽഹി, 2026 ഓഗസ്റ്റ് 29 –

ഇന്ത്യൻ പ്രതിരോധ കമ്പനികൾക്ക് വിദേശ വിപണികളിലേക്ക് വേഗത്തിൽ എത്താൻ കയറ്റുമതി, ലൈസൻസ് ചട്ടങ്ങൾ കേന്ദ്ര പ്രതിരോധ മന്ത്രാലയം ലളിതമാക്കി. പുതിയ പ്രതിരോധ കയറ്റുമതി നടപടിക്രമപ്രകാരം, മാരകമല്ലാത്ത പ്രതിരോധ ഉൽപ്പന്നങ്ങൾ ഭൂരിഭാഗം രാജ്യങ്ങളിലേക്കും കയറ്റുമതി ചെയ്യുമ്പോൾ വിവിധ മന്ത്രാലയങ്ങളുമായും സർക്കാർ ഏജൻസികളുമായും പ്രത്യേകം കൂടിയാലോചന നടത്തേണ്ടതില്ല. അന്താരാഷ്ട്ര ടെൻഡറുകൾക്കും പ്രദർശനങ്ങൾക്കുമായി ഉൽപ്പന്നങ്ങൾ അയയ്ക്കുമ്പോഴും ഈ നിബന്ധന ഒഴിവാക്കി. അതേസമയം സുരക്ഷാ പ്രാധാന്യമുള്ള രാജ്യങ്ങളുടെ കാര്യത്തിൽ നിയന്ത്രണങ്ങൾ തുടരും.

ഒറ്റ അനുമതിയിൽ ഒന്നിലധികം കയറ്റുമതി

പ്രതിരോധ ഉൽപ്പാദന വകുപ്പ് ഓപ്പൺ ജനറൽ എക്സ്പോർട്ട് ലൈസൻസ് സംവിധാനവും പരിഷ്കരിച്ചു. യോഗ്യതയുള്ള കയറ്റുമതിക്കാർക്ക് ഓരോ ചരക്ക് നീക്കത്തിനും പ്രത്യേകം അനുമതി തേടാതെ, നിശ്ചിത പ്രതിരോധ ഉൽപ്പന്നങ്ങളുടെ ഒന്നിലധികം കയറ്റുമതിക്ക് സ്വയം അനുമതി തയ്യാറാക്കാം. പ്രധാന പ്രതിരോധ സംവിധാനങ്ങൾ, ഉപകരണങ്ങളും ഘടകങ്ങളും, കമ്പനിക്കുള്ളിലെ സാങ്കേതികവിദ്യ കൈമാറ്റം എന്നിവയ്ക്കുണ്ടായിരുന്ന മൂന്ന് വ്യത്യസ്ത നടപടിക്രമങ്ങൾ ഇനി ഒറ്റ സംവിധാനമാക്കി. ലൈസൻസിന്റെ കാലാവധി രണ്ടിൽ നിന്ന് മൂന്ന് വർഷമാക്കി ഉയർത്തുകയും ചെയ്തു.

കൂടുതൽ രാജ്യങ്ങളിലേക്ക് അവസരം

ഓപ്പൺ ജനറൽ എക്സ്പോർട്ട് ലൈസൻസ് ബാധകമായ രാജ്യങ്ങളുടെ പരിധിയും വലിയ തോതിൽ കൂട്ടി. നേരത്തെ 41 രാജ്യങ്ങളായിരുന്നു പരിധിയിൽ. ഇനി നിയന്ത്രിതവും സുരക്ഷാ പ്രാധാന്യമുള്ളതുമായ രാജ്യങ്ങളും ഐക്യരാഷ്ട്രസഭയുടെ ഉപരോധമോ ആയുധ വിലക്കോ നേരിടുന്ന രാജ്യങ്ങളും ഒഴികെ എല്ലാ രാജ്യങ്ങളിലേക്കും സംവിധാനം വ്യാപിപ്പിക്കും. വിദേശ ആയുധനിർമാണ കമ്പനികളുമായി ദീർഘകാല കരാറുള്ള ഇന്ത്യൻ കമ്പനികൾക്കും പ്രത്യേക വ്യവസ്ഥ കൊണ്ടുവന്നു. അത്തരം കരാറുകളുടെ കാലാവധിക്ക് അനുസരിച്ച് യോഗ്യമായ ഉൽപ്പന്നങ്ങൾക്ക് ലൈസൻസ് നൽകാം.

ചെറുകിട കമ്പനികൾക്കും നേട്ടം

ചെറിയ തോക്കുകളുടെ ചില ഭാഗങ്ങളും ഘടകങ്ങളും സംരക്ഷണ ഉപകരണങ്ങളും സിവിലിയൻ ആവശ്യങ്ങൾക്ക് കയറ്റുമതി ചെയ്യാനും പുതിയ സംവിധാനം കൂടുതൽ അവസരം നൽകുന്നു. ആവർത്തിച്ചുള്ള അനുമതി നടപടികൾ കുറയ്ക്കുകയും വിദേശ ടെൻഡറുകളിലും പ്രദർശനങ്ങളിലും ഇന്ത്യൻ കമ്പനികൾക്ക് വേഗത്തിൽ പങ്കെടുക്കാൻ വഴിയൊരുക്കുകയുമാണ് ലക്ഷ്യം. ചെറുകിട, ഇടത്തരം പ്രതിരോധ കമ്പനികൾക്കും ഇത് സഹായകരമാകുമെന്ന് മന്ത്രാലയം പറയുന്നു. 2025-26ൽ ഇന്ത്യയുടെ പ്രതിരോധ ഉൽപ്പാദനം റെക്കോർഡ് ₹1.78 ലക്ഷം കോടിയിലെത്തി. പ്രതിരോധ കയറ്റുമതിയും ₹38,424 കോടിയെന്ന റെക്കോർഡ് നിലയിലെത്തി.