ന്യൂഡൽഹി, ജൂലൈ 10-

കൃത്യസമയത്ത് പറന്നുയർന്ന് എയർ ഇന്ത്യയുടെ വമ്പൻ കുതിപ്പ്. ജൂൺ മാസത്തിൽ ലോകത്തിൽ ഏറ്റവും സമയനിഷ്ഠ പാലിച്ച വിമാനക്കമ്പനികളുടെ പട്ടികയിൽ എയർ ഇന്ത്യ നാലാം സ്ഥാനം സ്വന്തമാക്കി. ആഗോളതലത്തിൽ മാത്രമല്ല, ഏഷ്യാ-പസഫിക് മേഖലയിലും കമ്പനി നാലാമതെത്തിയിട്ടുണ്ട്. പ്രമുഖ വ്യോമയാന വിവരവിശകലന സ്ഥാപനമായ സിറിയത്തിന്റെ (Cirium) 2026 ജൂണിലെ സമയനിഷ്ഠാ റിപ്പോർട്ടിലാണ് എയർ ഇന്ത്യയുടെ ഈ അഭിമാന നേട്ടം. നിരീക്ഷിച്ച 15,135 സർവീസുകളിൽ 86.85 ശതമാനവും കൃത്യസമയത്ത് തന്നെ ലക്ഷ്യസ്ഥാനത്ത് എത്തിക്കാൻ കമ്പനിക്ക് കഴിഞ്ഞു.

സമയത്ത് പറന്നത് 86.23 ശതമാനം

റിപ്പോർട്ടുകൾ പ്രകാരം എയർ ഇന്ത്യയുടെ 86.23 ശതമാനം വിമാനങ്ങളും നിശ്ചിത സമയത്ത് തന്നെ സർവീസ് ആരംഭിച്ചു. പ്രഖ്യാപിച്ച സർവീസുകളിൽ 99.7 ശതമാനവും റദ്ദാക്കാതെ പൂർത്തിയാക്കാനും കമ്പനിക്ക് സാധിച്ചിട്ടുണ്ട്. സർവീസുകളുടെ ആസൂത്രണം കൂടുതൽ കാര്യക്ഷമമാക്കിയതും, തത്സമയ നിരീക്ഷണം ശക്തമാക്കിയതും, കൃത്യമായ സമയത്ത് വേഗത്തിൽ തീരുമാനങ്ങൾ എടുത്തതുമാണ് ഈ വലിയ നേട്ടത്തിന് പിന്നിലെന്ന് എയർ ഇന്ത്യ അധികൃതർ വ്യക്തമാക്കി.

തിരക്കിനിടയിലും തിളക്കമാർന്ന പ്രകടനം

രാജ്യത്തെ ഏറ്റവും തിരക്കേറിയ ഡൽഹി, മുംബൈ വിമാനത്താവളങ്ങൾ കേന്ദ്രീകരിച്ചാണ് എയർ ഇന്ത്യയുടെ പ്രധാന സർവീസുകൾ നടക്കുന്നത്. വ്യോമഗതാഗത നിയന്ത്രണങ്ങളും വിമാനത്താവളങ്ങളിലെ തിരക്കും പലപ്പോഴും സർവീസുകളെ ബാധിക്കാറുമുണ്ട്. എന്നാൽ, ഇതിനെയെല്ലാം മറികടക്കാൻ വിമാനങ്ങൾ ഒരു സർവീസിന് ശേഷം അടുത്ത സർവീസിനായി തയാറാക്കുന്ന സമയം (turnaround time) കമ്പനി ഗണ്യമായി കുറച്ചു. കൂടാതെ, മോശം കാലാവസ്ഥ, സാങ്കേതിക തകരാറുകൾ, വ്യോമപാതാ നിയന്ത്രണങ്ങൾ എന്നിവ നേരിടാൻ പ്രത്യേക ബദൽ പദ്ധതികളും എയർ ഇന്ത്യ വിജയകരമായി നടപ്പാക്കി.

വഴിത്തിരിവാകുന്ന നവീകരണ പദ്ധതികൾ

എയർ ഇന്ത്യയുടെ സമഗ്ര നവീകരണ പദ്ധതികൾ പുരോഗമിക്കുന്നതിനിടയിലാണ് സമയനിഷ്ഠയിലെ ഈ ചരിത്ര മുന്നേറ്റം. 600 പുതിയ എയർബസ്, ബോയിങ് വിമാനങ്ങൾക്കാണ് കമ്പനി നിലവിൽ ഓർഡർ നൽകിയിരിക്കുന്നത്. ഇതിൽ മൂന്ന് ബോയിങ് 787-9 ഡ്രീംലൈനർ വിമാനങ്ങൾ കഴിഞ്ഞ ആറുമാസത്തിനിടെ സർവീസിന്റെ ഭാഗമായിക്കഴിഞ്ഞു. കൂടുതൽ വിമാനങ്ങൾ ഈ വർഷം അവസാനത്തോടെ എത്തുന്നതോടെ എയർ ഇന്ത്യയുടെ ദീർഘദൂര വിമാനങ്ങളിൽ പകുതിയിലധികവും അത്യാധുനിക സൗകര്യങ്ങളോടെ പുതുക്കപ്പെടും.