ഡൽഹി, 2026 ജൂൺ 17

രാജ്യത്തെ വാർഷിക പ്രതിരോധ ഉൽപ്പാദനം 2025-26 സാമ്പത്തിക വർഷത്തിൽ 1.78 ലക്ഷം കോടി രൂപയിലെത്തി. കഴിഞ്ഞ സാമ്പത്തിക വർഷത്തിലെ 1.54 ലക്ഷം കോടി രൂപയുമായി താരതമ്യം ചെയ്യുമ്പോൾ ഇത് 15.6 ശതമാനം വളർച്ചയാണ്. 2020-21 സാമ്പത്തിക വർഷത്തിലെ 84,643 കോടി രൂപയിൽ നിന്ന് 110 ശതമാനം വർധനയും രേഖപ്പെടുത്തി. 2013-14 സാമ്പത്തിക വർഷത്തിലെ 43,746 കോടി രൂപയേക്കാൾ സ്വദേശീയ പ്രതിരോധ ഉൽപ്പാദനം ഏകദേശം നാല് മടങ്ങായി ഉയർന്നു.

ആകെ ഉൽപ്പാദനത്തിന്റെ ഏകദേശം 76 ശതമാനം പ്രതിരോധ പൊതുമേഖലാ സ്ഥാപനങ്ങളും മറ്റ് പൊതുമേഖലാ സ്ഥാപനങ്ങളും നിർവഹിച്ചു. സ്വകാര്യ മേഖലയുടെ പങ്ക് 24 ശതമാനമായി ഉയർന്നു. മുൻ വർഷം ഇത് 22 ശതമാനമായിരുന്നു. 2025-26 സാമ്പത്തിക വർഷത്തിൽ സ്വകാര്യ മേഖലയുടെ സംഭാവന ഏകദേശം 42,000 കോടി രൂപയിലെത്തി. ആത്മനിർഭർ ഭാരത് പദ്ധതിയുടെ ഭാഗമായി പ്രതിരോധ നിർമ്മാണ രംഗത്ത് സ്വയംപര്യാപ്തത വർധിപ്പിക്കാനുള്ള സർക്കാർ ശ്രമങ്ങളാണ് ഈ നേട്ടത്തിന് പിന്നിലെന്നാണ് വിലയിരുത്തൽ.

പ്രതിരോധ ഉൽപ്പാദനത്തിലെ ഈ വളർച്ച 2025-26 സാമ്പത്തിക വർഷത്തിൽ 38,424 കോടി രൂപയുടെ റെക്കോർഡ് പ്രതിരോധ കയറ്റുമതിയിലേക്കും വഴിയൊരുക്കി. രാജ്യത്തിന്റെ പ്രതിരോധ വ്യവസായ അടിത്തറ വികസിക്കുന്നതിന്റെ വ്യക്തമായ സൂചനയാണ് ഈ മുന്നേറ്റമെന്ന് പ്രതിരോധമന്ത്രി രാജ്നാഥ് സിങ് വ്യക്തമാക്കി. നയപരമായ പിന്തുണ, പുതിയ പദ്ധതികൾ, സ്വകാര്യ മേഖലയുടെ കൂടുതൽ പങ്കാളിത്തം, കയറ്റുമതി ശേഷിയിലെ വർധന എന്നിവയിലൂടെ പ്രതിരോധ ഉൽപ്പാദന രംഗം വരും വർഷങ്ങളിലും കൂടുതൽ വളർച്ച കൈവരിക്കുമെന്ന പ്രതീക്ഷയും അദ്ദേഹം പങ്കുവെച്ചു.