കൊല്ലം, 2026 ജൂൺ 13 –
ജില്ലയിൽ പൾസ് പോളിയോ വാക്സിനേഷന് എല്ലാ ഒരുക്കങ്ങളും പൂർത്തിയായതായി ജില്ലാ കളക്ടർ അറിയിച്ചു. അഞ്ചു വയസിനു താഴെയുള്ള കുട്ടികൾക്ക് ജൂൺ 28ന് പൾസ് പോളിയോ തുള്ളിമരുന്ന് നൽകും. പോളിയോ പ്രതിരോധ പ്രവർത്തനങ്ങൾക്കായി വിവിധ വകുപ്പുകളുടെ ഏകോപനം ഉറപ്പാക്കാൻ ചേർന്ന ഇന്റർ സെക്ടറൽ കോർഡിനേഷൻ കമ്മിറ്റി യോഗത്തിലായിരുന്നു പ്രഖ്യാപനം.
ജില്ലയിലെ 1,27,375 കുട്ടികൾക്ക് തുള്ളിമരുന്ന് നൽകുന്നതിനുള്ള തയ്യാറെടുപ്പുകൾ പൂർത്തിയായിട്ടുണ്ട്. വിവിധ ആരോഗ്യ സ്ഥാപനങ്ങൾ, അങ്കണവാടികൾ, ബസ് സ്റ്റാൻഡുകൾ, റെയിൽവേ സ്റ്റേഷനുകൾ എന്നിവ ഉൾപ്പെടെയുള്ള നിശ്ചിത കേന്ദ്രങ്ങളിലൂടെ വാക്സിനേഷൻ നടത്തും. ഇതിനായി ജില്ലയിൽ 1,755 ബൂത്തുകൾ പ്രവർത്തിപ്പിക്കും.
ആരോഗ്യ വകുപ്പ്, തദ്ദേശസ്വയംഭരണ സ്ഥാപനങ്ങൾ, ഐ.സി.ഡി.എസ്, വിദ്യാഭ്യാസ വകുപ്പ്, ഐ.എം.എ, ഐ.എ.പി, സന്നദ്ധ സംഘടനകൾ എന്നിവയുടെ പങ്കാളിത്തം ഉറപ്പാക്കും. ഇതര സംസ്ഥാന തൊഴിലാളികളുടെ കുടുംബങ്ങളിലെയും കുടിയേറ്റ ജനവിഭാഗങ്ങളിലെയും കുട്ടികൾക്ക് പ്രത്യേക ശ്രദ്ധ നൽകി തുള്ളിമരുന്ന് നൽകുമെന്നും അധികൃതർ അറിയിച്ചു.
