കഴക്കൂട്ടം, 2026 ജൂൺ 13 –
സിബിഐ ഓഫീസിൽ നിന്നാണെന്ന് തെറ്റിദ്ധരിപ്പിച്ച് വീഡിയോ കോൾ വഴി വീട്ടമ്മയിൽ നിന്ന് 16 ലക്ഷത്തിലധികം രൂപ തട്ടിയെടുത്തതായി പരാതി. പൗഡിക്കോണം സ്വദേശിനിയായ 67 കാരിക്കാണ് പണം നഷ്ടമായത്. മേയ് 18 നാണ് രണ്ടംഗ സംഘം വാട്സ്ആപ്പ് വീഡിയോ കോൾ വഴി വീട്ടമ്മയെ ബന്ധപ്പെടുകയും തട്ടിപ്പിന് ഇരയാക്കുകയും ചെയ്തത്.
പരാതിക്കാരിയുടെ തിരിച്ചറിയൽ രേഖകൾ ഉപയോഗിച്ച് നിരവധി സാമ്പത്തിക തട്ടിപ്പുകൾ നടന്നിട്ടുണ്ടെന്നും അത് പരിശോധിക്കേണ്ടതുണ്ടെന്നും പറഞ്ഞായിരുന്നു ഭീഷണിപ്പെടുത്തൽ. സിബിഐ ഉദ്യോഗസ്ഥരാണെന്നും ആധാർ കാർഡ് ദുരുപയോഗം ചെയ്തിട്ടുണ്ടെന്നും കള്ളപ്പണ ഇടപാടിൽ പങ്കുണ്ടെന്നും സംഘം ആരോപിച്ചു. തുടർന്ന് മുംബൈയിലെ നോട്ടറി പബ്ലിക് ഓഫീസിൽ നിന്നുള്ളതെന്ന് തോന്നിപ്പിക്കുന്ന വ്യാജരേഖ അയക്കുകയും വിവിധ യു.പി.ഐ. ലിങ്കുകൾ ക്ലിക്ക് ചെയ്യിപ്പിക്കുകയും ചെയ്തു.
മേയ് 19 മുതൽ ജൂൺ 6 വരെ പലതവണകളായി 16,36,999 രൂപയാണ് തട്ടിയെടുത്തത്. പരാതിയെ തുടർന്ന് തിരുവനന്തപുരം സിറ്റി സൈബർ പൊലീസ് അന്വേഷണം ആരംഭിച്ചു. തട്ടിപ്പിന് പിന്നിലുള്ളവരെ കണ്ടെത്താനുള്ള ശ്രമങ്ങൾ തുടരുകയാണ്.
