ഉള്ളൂർ, 2026 ജൂൺ 13 –
തിരുവനന്തപുരം മെഡിക്കൽ കോളജ് ആശുപത്രിയിൽ നിന്ന് കാണാതായ ശ്രീലങ്കൻ സ്വദേശിനിയെ പൊലീസ് കണ്ടെത്തി. സിലേനി ഉദേനി എന്ന 29 കാരിയെയാണ് മെഡിക്കൽ കോളജ് പൊലീസ് കണ്ടെത്തിയത്. തിരുവനന്തപുരം കിംസ് ആശുപത്രിക്ക് സമീപമുള്ള ഒരു ലോഡ്ജിലായിരുന്നു യുവതി താമസിച്ചിരുന്നത്.
അമിതമായി ടാബ്ലെറ്റുകൾ കഴിച്ചതിനെ തുടർന്ന് അവശനിലയിലായ യുവതിയെ സമീപത്തുണ്ടായിരുന്നവരാണ് മെഡിക്കൽ കോളജ് ആശുപത്രിയിൽ എത്തിച്ചത്. വെള്ളിയാഴ്ച രാത്രി 11 മണിയോടെയാണ് ആശുപത്രിയിലെ 14-ാം വാർഡിൽ പ്രവേശിപ്പിച്ചത്. ചികിത്സയിലിരിക്കെ ശനിയാഴ്ച രാവിലെ 11 മണിയോടെ യുവതിയെ കാണാതാവുകയായിരുന്നു. ആശുപത്രി അധികൃതർ പിന്നീട് വിവരമറിഞ്ഞതോടെ പൊലീസിനെ അറിയിക്കുകയായിരുന്നു.
മെഡിക്കൽ കോളജ് പൊലീസ് നടത്തിയ അന്വേഷണത്തിലാണ് യുവതി താമസിച്ചിരുന്ന ലോഡ്ജിൽ തന്നെ ഇവർ ഉള്ളതായി കണ്ടെത്തിയത്. ആരോഗ്യനില മെച്ചപ്പെട്ടതിനെ തുടർന്ന് സ്വമേധയാ ആശുപത്രിയിൽ നിന്ന് ലോഡ്ജിലേക്ക് പോയതാണെന്ന് യുവതി പൊലീസിനോട് അറിയിച്ചു.
