കൊച്ചി, 2026 ജൂൺ 13 –
ഇ. ശ്രീധരൻ മുന്നോട്ടുവച്ച അതിവേഗ റെയിൽപാത കേരളത്തിന്റെ ആവശ്യങ്ങൾക്ക് അനുയോജ്യമല്ലെന്ന് കെ റെയിൽ വിരുദ്ധ ജനകീയ സമിതി. സംസ്ഥാനത്തിന് ഇപ്പോൾ ആവശ്യം അതിവേഗ റെയിൽ പോലുള്ള പദ്ധതികളല്ലെന്നും നിലവിലുള്ള പൊതുഗതാഗത സംവിധാനത്തിന്റെ വികസനമാണെന്നും സമിതി വ്യക്തമാക്കി. കൊച്ചിയിൽ നടത്തിയ പ്രതികരണത്തിലാണ് സമിതി നിലപാട് അറിയിച്ചത്.
ശ്രീധരന്റെ നിർദേശം യുക്തിഹീനമാണെന്നാണ് സമിതിയുടെ വിമർശനം. യാത്രക്കാർക്ക് തിരക്കില്ലാതെ യാത്ര ചെയ്യാൻ കഴിയുന്ന രീതിയിൽ പൊതുവായ റെയിൽ ഗതാഗത സംവിധാനം മെച്ചപ്പെടുത്തണമെന്നും കൂടുതൽ പാതകൾ ഒരുക്കണമെന്നും അവർ ആവശ്യപ്പെട്ടു. നിലവിലെ സിഗ്നലിങ് സംവിധാനം നവീകരിക്കുകയും റെയിൽവേയുടെ നിലവിലുള്ള സാധ്യതകൾ പ്രയോജനപ്പെടുത്തി വേഗത സംബന്ധമായ പ്രശ്നങ്ങൾ പരിഹരിക്കണമെന്നും സമിതി അഭിപ്രായപ്പെട്ടു.
കെ റെയിൽ വിരുദ്ധ ജനകീയ സമിതി തുടർന്നും ജാഗ്രത സമിതിയായി പ്രവർത്തിക്കുമെന്നും വിഷയത്തിൽ മുഖ്യമന്ത്രിയെ കാണുമെന്നും അറിയിച്ചു. ഇ. ശ്രീധരന്റെ റിപ്പോർട്ട് പഠിക്കാൻ നിയോഗിച്ച സമിതിയിൽ വിശ്വാസമുണ്ടെന്നും അവർ പറഞ്ഞു. എന്നാൽ സിൽവർ ലൈനിന് സമാനമായ ഒരു പദ്ധതി മുന്നോട്ടുവന്നാൽ അതിനെ ശക്തമായി എതിർക്കുമെന്നും സമിതി മുന്നറിയിപ്പ് നൽകി.
