ഡെറാഡൂൺ, 2026 ജൂൺ 13

ഇന്ത്യൻ സൈനിക അക്കാദമിയിൽ നടന്ന നൂറ്റിയമ്പത്തിയെട്ടാമത് സ്ഥിരം കോഴ്സിന്റെയും നൂറ്റിനാല്പത്തിയൊന്നാമത് സാങ്കേതിക ബിരുദധാരി കോഴ്സിന്റെയും പരിശീലനം പൂർത്തിയാക്കിയ കേഡറ്റുകളുടെ പാസിംഗ് ഔട്ട് പരേഡ് രാഷ്ട്രപതി ദ്രൗപദി മുർമു ഇന്ന് ഡെറാഡൂണിൽ വിലയിരുത്തി. രാജ്യത്തെ ഏറ്റവും കഠിനമായ പരിശീലന പരിപാടികളിലൊന്ന് വിജയകരമായി പൂർത്തിയാക്കിയതിന് രാഷ്ട്രപതി ഉദ്യോഗസ്ഥ കേഡറ്റുമാരെ അഭിനന്ദിച്ചു.

കേഡറ്റുമാരുടെ ധൈര്യവും വിവേകവും അവരുടെ ശക്തിയാകുമെന്ന് രാഷ്ട്രപതി പറഞ്ഞു. ഒൻപത് വനിതാ കേഡറ്റുമാരുടെ സാന്നിധ്യം അക്കാദമിയുടെ ചരിത്രത്തിലെ നിർണായക നിമിഷമാണെന്നും ഇത് രാജ്യത്തിന്റെ പ്രതിരോധ സേനകളുടെ ചരിത്രത്തിലെ നാഴികക്കല്ലാണെന്നും അവർ വ്യക്തമാക്കി. വനിതാ നേതൃത്വത്തിലുള്ള വികസനത്തിലേക്കുള്ള ഇന്ത്യയുടെ മുന്നേറ്റത്തിന്റെ പ്രചോദനാത്മക ഉദാഹരണമാണിതെന്നും കൂടുതൽ വനിതാ കേഡറ്റുമാർ അക്കാദമിയിലേക്ക് എത്തുമെന്ന പ്രതീക്ഷയും രാഷ്ട്രപതി പങ്കുവച്ചു. വിദേശ രാജ്യങ്ങളിൽ നിന്നുള്ള കേഡറ്റുമാരെയും അവർ അഭിനന്ദിച്ചു.

ലോക രാജ്യങ്ങളുമായുള്ള സൗഹൃദവും സഹകരണവും സമാധാനപരമായ ബന്ധങ്ങളും ശക്തിപ്പെടുത്താനുള്ള ഇന്ത്യയുടെ പ്രതിബദ്ധതയാണ് വിദേശ കേഡറ്റുമാരുടെ സാന്നിധ്യം കാണിക്കുന്നതെന്ന് രാഷ്ട്രപതി പറഞ്ഞു. രാജ്യത്തിന്റെ പരമാധികാരവും ഐക്യവും അഖണ്ഡതയും സംരക്ഷിക്കേണ്ട ഉത്തരവാദിത്വം യുവ ഉദ്യോഗസ്ഥർക്കുണ്ടെന്ന് അവർ ഓർമിപ്പിച്ചു. അതിവേഗം മാറുന്ന സുരക്ഷാ വെല്ലുവിളികളുടെയും സാങ്കേതിക മുന്നേറ്റങ്ങളുടെയും കാലത്ത് ഇന്ത്യൻ സൈന്യം ഭാവിക്കായി സജ്ജമായിരിക്കണമെന്നും അവർ പറഞ്ഞു. സൈനികരെ നയിക്കുകയും സംരക്ഷിക്കുകയും അവരുടെ ക്ഷേമം ഉറപ്പാക്കുകയും ചെയ്യേണ്ട ഉത്തരവാദിത്വം ഉദ്യോഗസ്ഥർക്കുണ്ടെന്നും രാഷ്ട്രപതി കൂട്ടിച്ചേർത്തു.

.