ദില്ലി, 2026 ജൂൺ 10 –
പ്രതിരോധ വാങ്ങൽ നടപടികൾ, പ്രതിരോധ മേഖലയിലെ നവീകരണ പദ്ധതികൾ, സാങ്കേതിക ശേഷി വികസന മാർഗരേഖ, പരീക്ഷണ നടപടികൾ എന്നിവയെക്കുറിച്ച് ചെറുകിട സംരംഭങ്ങൾക്കും പുതുസംരംഭങ്ങൾക്കും വേണ്ടി ജൂൺ 11, 12 തീയതികളിൽ ദില്ലി കാന്റിലുള്ള മനേക്ഷാ കേന്ദ്രത്തിൽ ശിൽപശാല നടക്കും. സ്വദേശിവത്കരണ ഡയറക്ടറേറ്റും സംയോജിത പ്രതിരോധ സ്റ്റാഫ് ആസ്ഥാനവും സംയുക്ത യുദ്ധപഠന കേന്ദ്രവും ചേർന്നാണ് പരിപാടി സംഘടിപ്പിക്കുന്നത്.
പ്രതിരോധ മേഖലയിലെ ചെറുകിട സംരംഭങ്ങളുടെയും പുതുസംരംഭങ്ങളുടെയും പങ്കാളിത്തം വർധിപ്പിക്കുകയാണ് ലക്ഷ്യം. പ്രതിരോധ വാങ്ങൽ നടപടികൾ, സ്വദേശിവത്കരണ സംരംഭങ്ങൾ, പരീക്ഷണ-സാക്ഷ്യപ്പെടുത്തൽ നടപടികൾ തുടങ്ങിയ വിഷയങ്ങളിൽ വ്യവസായ പ്രതിനിധികൾക്ക് നേരിട്ട് അറിവ് നേടാൻ അവസരം ലഭിക്കും. വിവിധ സംഘടനകളിലെ മുതിർന്ന ഉദ്യോഗസ്ഥരും വിദഗ്ധരും പങ്കെടുക്കുന്നവരുമായി സംവദിക്കും. ആദ്യദിനത്തിൽ പ്രതിരോധ ഏറ്റെടുക്കൽ നടപടികൾ, വാങ്ങൽ വിഭാഗങ്ങൾ, സ്വദേശിവത്കരണ പരിഷ്കാരങ്ങൾ, ബൗദ്ധിക സ്വത്തവകാശങ്ങൾ തുടങ്ങിയ വിഷയങ്ങൾ ചർച്ചയാകും. രണ്ടാംദിനത്തിൽ നവീകരണ സംരംഭങ്ങൾ, മാതൃക വികസനം, പരീക്ഷണ-മൂല്യനിർണയ നടപടികൾ, ഗവേഷണ-വികസന രംഗത്തെ പങ്ക് എന്നിവയാണ് പ്രധാന വിഷയങ്ങൾ.
വ്യവസായ രംഗം നേരിടുന്ന പ്രായോഗിക പ്രശ്നങ്ങൾക്ക് സംവാദങ്ങളിലൂടെയും ചോദ്യോത്തരവേളകളിലൂടെയും പരിഹാരം കണ്ടെത്തുകയാണ് ശിൽപശാലയുടെ മറ്റൊരു ലക്ഷ്യം. പ്രതിരോധ നിർമ്മാണ രംഗത്തെ സ്വയംപര്യാപ്തത ശക്തിപ്പെടുത്താനും പ്രതിരോധ സേനയും ഇന്ത്യൻ വ്യവസായ മേഖലയുമായി കൂടുതൽ സഹകരണം വളർത്താനും ഈ സംരംഭം സഹായിക്കുമെന്നാണ് പ്രതീക്ഷ.
.
