കൊച്ചി | 2026 മെയ് 28
നടി അൻസിബ ഹസൻ മുഖ്യമന്ത്രിക്കും ഡിജിപിക്കും പരാതി നൽകി. നടി ലക്ഷ്മിപ്രിയയുടെയും തൃപ്പൂണിത്തുറ സബ് ഇൻസ്പെക്ടർ രേഷ്മയുടെയും നടപടിക്കെതിരെയാണ് പരാതി. പൊലീസ് സ്റ്റേഷനിൽ നിയമവിരുദ്ധമായി തടഞ്ഞുവെച്ചെന്നും അവഹേളിച്ചെന്നും അൻസിബ ആരോപിക്കുന്നു.
ലക്ഷ്മിപ്രിയ നൽകിയ പരാതിയുടെ അടിസ്ഥാനത്തിലാണ് അൻസിബയെ സ്റ്റേഷനിലേക്ക് വിളിപ്പിച്ചത്. അവിടെ വനിതാ പൊലീസ് ഉദ്യോഗസ്ഥ തന്നെ അപമാനിക്കുകയും ഭീഷണിപ്പെടുത്തുകയും ചെയ്തുവെന്നാണ് ആരോപണം. തനിക്കെതിരായ പരാതി ഗൂഢാലോചനയുടെ ഭാഗമാണെന്നും അൻസിബ പറയുന്നു. സംഭവത്തിൽ ഒരു കോടി രൂപ നഷ്ടപരിഹാരവും ആവശ്യപ്പെട്ടിട്ടുണ്ട്.
ഇതിനിടെ താരസംഘടനയായ ‘അമ്മ’യിലെ ആഭ്യന്തര തർക്കവും കൂടുതൽ രൂക്ഷമായി. അൻസിബ ഹസൻ, ടിനി ടോം, കുക്കു പരമേശ്വരൻ, ലക്ഷ്മിപ്രിയ എന്നിവർക്ക് കാരണം കാണിക്കൽ നോട്ടീസ് നൽകി. ജൂൺ ഒന്നിനും മൂന്നിനും ഇടയിൽ നേരിട്ട് ഹാജരായി വിശദീകരണം നൽകാനാണ് നിർദ്ദേശം.
ടിനി ടോമിനെതിരെ അൻസിബ ഉന്നയിച്ച പരാതിയും സംഘടന പ്രത്യേകം കേൾക്കാൻ തീരുമാനിച്ചിട്ടുണ്ട്. ജൂൺ ആദ്യവാരം അൻസിബയെ നേരിട്ട് വിളിച്ച് സംസാരിക്കാനാണ് ‘അമ്മ’ നേതൃത്വം നീക്കം നടത്തുന്നത്. പക്ഷേ നിലവിലെ നേതൃത്വത്തിന് മുന്നിൽ ഹാജരാകില്ലെന്ന നിലപാടിലാണ് അൻസിബ.
പരാതി പരിശോധിക്കാൻ നിഷ്പക്ഷ സമിതി വേണമെന്നാണ് അൻസിബയുടെ ആവശ്യം. രമേഷ് പിഷാരടി, ധ്യാൻ ശ്രീനിവാസൻ, മാലാ പാർവ്വതി എന്നിവർ സമിതിയിൽ ഉണ്ടാകണമെന്നും അവർ ആവശ്യപ്പെടുന്നു. മൊഴി നൽകുമ്പോൾ വീഡിയോ റെക്കോർഡിങ് ഉറപ്പാക്കണമെന്നും അൻസിബ പറയുന്നു.
ജൂൺ 21ന് ‘അമ്മ’ ജനറൽ ബോഡി യോഗം നടക്കാനിരിക്കെ സംഘടനയ്ക്കുള്ളിലെ പ്രശ്നങ്ങൾ തീർക്കാനുള്ള ശ്രമത്തിലാണ് ഭരണസമിതി. സംഘടനയിലെ തർക്കം പൊലീസ് കേസുകളിലേക്കും വലിയ വിഭാഗീയതയിലേക്കും പോകാതിരിക്കാനാണ് നേതൃത്വത്തിന്റെ ഇടപെടൽ.
ടിനി ടോം തന്നെക്കുറിച്ച് മോശം പ്രചാരണം നടത്തിയെന്നും ജിഹാദിയെന്ന് വിളിച്ചെന്നും അൻസിബ നേരത്തെ ആരോപിച്ചിരുന്നു. അതേ വിഷയമാണ് ഇപ്പോൾ സംഘടനയ്ക്കുള്ളിൽ വലിയ വിവാദമായി മാറിയിരിക്കുന്നത്.
