കൊച്ചി: കൂടുതല്‍ ജനദ്രോഹപരവും ദുരുപയോഗ സാധ്യതകള്‍ വർധിക്കുന്ന വിധത്തിലുമായി മാറുന്ന നനിയമ ഭേദഗതി ബില്‍ .അംഗീകരിക്കാനാകാത്തതാണെന്ന് കെസിബിസി ജാഗ്രത കമ്മീഷൻ. ഗൗരവമേറിയതും ആശങ്കാജനകവുമായ മാറ്റങ്ങളാണ് പുതിയ ബില്ലില്‍ ഉള്‍പ്പെടുത്തിയിട്ടുള്ളത്..പിഴത്തുകയുടെ വൻ വർധന, ബീറ്റ് ഫോറസ്റ്റ് ഓഫീസർക്കു നല്‍കിയിരിക്കുന്ന പരിധി വിട്ട അധികാരങ്ങള്‍, മത്സ്യബന്ധനം, പാഴ് വസ്തുക്കള്‍ വനപ്രദേശത്തോ വനത്തിലേക്ക് ഒഴുകിയെത്തുന്ന പുഴയിലോ എത്തിപ്പെടുന്നത് ശിക്ഷാർഹമാക്കിയിരിക്കുന്നത് തുടങ്ങിയ പരിഷ്കരണങ്ങള്‍ വനാതിർത്തികളില്‍ ജീവിക്കുന്ന സാധാരണക്കാർക്ക് വലിയ വെല്ലുവിളി ഉയർത്തുന്നവയാണ്.
നിരപരാധികള്‍ ശിക്ഷിക്കപ്പെടാൻ ഇടയാകും
.
സംശയത്തിന്‍റെയോ തെറ്റിദ്ധാരണകളുടെയോ പേരില്‍ അനേകം നിരപരാധികള്‍ ശിക്ഷിക്കപ്പെടാൻ ഇത്തരം കരിനിയമങ്ങള്‍ കാരണമാകും. വനപാലകർക്ക് കൂടുതല്‍ അധികാരങ്ങളും കൂടുതല്‍ ദുരുപയോഗസാധ്യതകളും നല്‍കുന്ന ഈ നിയമപരിഷ്കരണം പ്രതിഷേധാർഹവും പിൻവലിക്കപ്പെടേണ്ടതുമാണ്.
വന്യമൃഗങ്ങളെ വനത്തിന്‍റെ പരിധിയില്‍ നിലനിർത്താൻമുളള വകുപ്പുകള്‍ കൂട്ടിച്ചേർക്കപ്പെടണം
വന്യമൃഗങ്ങളെ വനത്തിന്‍റെ പരിധിയില്‍ നിലനിർത്താൻ ബന്ധപ്പെട്ട ഉദ്യോഗസ്ഥർ നിർബന്ധിതരാകുന്ന വിധത്തിലുള്ള വകുപ്പുകള്‍ വനനിയമത്തില്‍ കൂട്ടിച്ചേർക്കപ്പെടണം. തങ്ങളുടെ പരിധിയിലുള്ള വനത്തില്‍നിന്ന് വന്യമൃഗങ്ങള്‍ ജനവാസമേഖലയിലേക്കു പ്രവേശിക്കുന്നത് ഉദ്യോഗസ്ഥരുടെ വീഴ്ചയാണ്. പ്രദേശത്തിന്‍റെ അത്യാവശ്യ വികസനം പോലും തടസപ്പെടുത്തുന്ന നിലവിലുള്ള നിയമങ്ങള്‍ക്ക് ജനോപകാരപ്രദമായ പരിഷ്കരണങ്ങള്‍ വരുത്താനും സർക്കാർ തയാറാകണമെന്ന് കെസിബിസി ജാഗ്രത കമ്മീഷൻ ആവശ്യപ്പെട്ടു
