ബെംഗളൂരു: ഇന്ത്യയുടെ സൗരദൗത്യമായ ആദിത്യ എല്‍ ഒന്ന് ഭൂമിയുടെ ഭ്രമണപഥത്തോട് യാത്ര പറഞ്ഞു. ഭൂമിക്കും സൂര്യനുമിടയിലെ ലഗ്രാഞ്ച് വണ്‍ പോയിന്റിലേക്കുള്ള യാത്രയിലാണിപ്പോള്‍ ആദിത്യ പേടകം. ത്രസ്റ്റര്‍ എന്‍ജിന്‍ ജ്വലിപ്പിച്ച് പേടകത്തെ ട്രാന്‍സ് ലഗ്രാഞ്ചിയന്‍ പോയിന്റ് വണ്‍ പാതയിലേക്കു മാറ്റുന്ന പ്രക്രിയ പുലര്‍ച്ചെ രണ്ടു മുതലാണ് ആരംഭിച്ചത്. 15 മിനുട്ടുകൊണ്ട് പ്രക്രിയ പൂര്‍ത്തിയായി. ഇത് അഞ്ചാം തവണയാണ് ഐഎസ്ആര്‍ഒ ഒരു പേടകത്തെ ഭൂമിയുടെ ഭ്രമണപഥത്തിന് പുറത്തേക്ക് അയക്കുന്നത്.
പേടകം ലഗ്രാഞ്ച് പോയിന്റിലെത്താന്‍ 110 ദിവസമെടുക്കുമെന്ന് ഐഎസ്ആര്‍ഒ അറിയിച്ചു. ഭൂമിയില്‍നിന്ന് 15 ലക്ഷം കിലോമീറ്റര്‍ അകലെയാണ് ലഗ്രാഞ്ച് പോയിന്റ്. ജനുവരി ആദ്യ വാരത്തോടെയായിരിക്കും പേടകം ഇവിടെയെത്തുക. ഇവിടെ നിലയുറപ്പിച്ച് ആദിത്യ നിര്‍ണായകപഠനങ്ങള്‍ നടത്തും. വിവിധ ഗോളങ്ങളുടെയും നക്ഷത്രങ്ങളുടെയും ഗുരുത്വാകര്‍ഷണം സന്തുലിതമായ ഈ പോയിന്റില്‍ പേടകം എത്തിക്കാനായാല്‍ സൂര്യന്റെ പുറംപാളിയിലെ വിവരങ്ങള്‍ സുരക്ഷിതമായി ശേഖരിക്കാന്‍ സാധിക്കും.
സൂര്യന്റെ പുറംഭാഗത്തെ താപവ്യതിയാനങ്ങളും സൗര കൊടുങ്കാറ്റിന്റെ ഫലങ്ങളും കണ്ടെത്തുകയാണ് പ്രധാന ദൗത്യം. സൗര വികിരണങ്ങള്‍ കാരണം ഭൂമിയുടെ അന്തരീക്ഷത്തിലും കാലാവസ്ഥയിലും ഉണ്ടാകുന്ന മാറ്റങ്ങള്‍, സൂര്യന്റെ ഉപരിതലം, കൊറോണ ഗ്രാഫ് എന്നറിയപ്പെടുന്ന സൂര്യന്റെ ബാഹ്യവലയങ്ങള്‍, 15 ലക്ഷം കിലോമീറ്റര്‍ അകലെയുള്ള ബഹിരാകാശം എന്നിവയും പഠനവിധേയമാകും. ഏഴ് പേലോഡുകളില്‍ നാലെണ്ണം സൂര്യനെ നേരിട്ട് നിരീക്ഷിക്കുമ്പോള്‍ മൂന്നെണ്ണം ലഗ്രാഞ്ച് പോയിന്റിലെ സാഹചര്യങ്ങളാകും പഠിക്കുക. ഈ മാസം രണ്ടിനാണ് പിഎസ്എല്‍വി- സി 57 റോക്കറ്റിലേറി ആദിത്യ യാത്രയാരംഭിച്ചത്.
