രാഹുല്‍ ഗാന്ധിക്കെതിരായ നടപടികള്‍ മിന്നല്‍ വേഗത്തില്‍ പുരോഗമിക്കെ വയനാട് മണ്ഡലത്തില്‍ ഉപതിരഞ്ഞെടുപ്പു വേഗത്തില്‍ നടത്താനും നീക്കം. ഒരു മണ്ഡലവും ഒഴിഞ്ഞു കിടക്കുന്നതു നല്ലതല്ല എന്ന തിരഞ്ഞെടുപ്പു കമ്മിഷന്റെ പ്രതികരണം ഇതാണ് സൂചിപ്പിക്കുന്നതും.
സോഷ്യല്‍ മീഡിയ പിന്തുണയ്ക്കുന്നത് പ്രിയങ്കയെ
രാഹുല്‍ അയോഗ്യനായ നിമിഷം മുതല്‍ കേരളത്തിലെ കോണ്‍ഗ്രസ് കേന്ദ്രത്തില്‍ ഉപതിരഞ്ഞെടുപ്പു ചര്‍ച്ചകളും ഉയര്‍ന്നിട്ടുണ്ട്. വയനാട്ടില്‍ രാഹുല്‍ ഇല്ലെങ്കില്‍ പ്രിയങ്ക എന്ന തരത്തില്‍ പ്രിയങ്കയുടെ ഫോട്ടോ ഉപയോഗിച്ചു സാമൂഹിക മാധ്യമങ്ങളില്‍ പ്രചാരണം പ്രത്യക്ഷപ്പെട്ടിരുന്നു. വയനാട്ടില്‍ ഉപതിരഞ്ഞെടുപ്പുണ്ടാവുകയാണെങ്കില്‍ പ്രിയങ്കയെ രംഗത്തിറക്കുക എന്ന നീക്കം തന്നെയാണു കോണ്‍ഗ്രസില്‍ ഉണ്ടാവുക.
ടി സിദ്ധിഖിനു കണ്ടുവച്ച വയനാടു മണ്ഡലം രാഹുലിന് ഒഴിഞ്ഞു കൊടുത്തതിനു പകരം അദ്ദേഹത്തിനു നിയമസഭാ സീറ്റു നല്‍കിയതിനാല്‍ കോണ്‍ഗ്രസ്സില്‍ മറ്റാര്‍ക്കും വയനാട് മണ്ഡലത്തില്‍ ക്ലെയിം ഇല്ല.
മികച്ച സ്ഥാനാര്‍ഥിയെ നിര്‍ത്താന്‍ ബിജെപി, ഇടതിന് സിപിഐയ്ക്ക് അവസരം
യുഡിഎഫിന്റെ ഉറച്ച സീറ്റായ വയനാട്ടില്‍ മികച്ച സ്ഥാനാര്‍ഥിയെ നിര്‍ത്തി ദേശീയ തലത്തില്‍ ശ്രദ്ധേയമായ പോരാട്ടം നടത്താനാവും ബി ജെ പി ശ്രമിക്കുക. ഇടതുമുന്നണിയില്‍ സിപിഐയുടെ സീറ്റാണ് വയനാട്. കഴിഞ്ഞ തവണ മികച്ച മത്സരം കാഴ്ച വയ്ക്കാന്‍ പോലും സി പി ഐ സ്ഥാനാര്‍ഥിക്കു കഴിഞ്ഞിരുന്നില്ല. നാലു ലക്ഷത്തില്‍പ്പരം വോട്ടുകളുടെ ഭൂരിപക്ഷത്തിനാണ് രാഹുല്‍ ജയിച്ചത്.
ഇടതു മുന്നണിയുടെ ഭാഗമായ എല്‍ ജെ ഡി തങ്ങള്‍ക്കു സ്വാധീനമുള്ള വയനാട്ടില്‍ നല്ല മത്സരം കാഴ്ചവയ്ക്കാന്‍ കഴിയുമെന്ന് ആഗ്രഹിക്കുന്നുണ്ട്. എല്‍ ജെ ഡി നേതാവ് ശ്രേയാംസ് കുമാറിനെ തന്നെ രംഗത്തിറക്കിയാല്‍ വിജയിക്കാന്‍ കഴിയുമെന്ന അഭിപ്രായവും അവര്‍ക്കുണ്ട്. സി പി ഐക്ക് മറ്റു മണ്ഡലം നല്‍കി വയനാട് തങ്ങള്‍ക്കു ലഭിക്കുമോ എന്ന സാധ്യത ആരായാന്‍ എല്‍ ജെ ഡിയിലും ആലോചന നടക്കുന്നുണ്ട്. എല്‍ ജെ ഡി- ജെ ഡി എസ് ലയനം പൊടുന്നനെ പൂര്‍ത്തീകരിക്കാന്‍ കഴിഞ്ഞാല്‍ ജെ ഡി എസ് തന്നെ ഇടതു മുന്നണിയില്‍ ഈ ആവശ്യം ഉന്നയിച്ചേക്കും.
നിയമപോരാട്ടവും തുടരും
ജനപ്രതിനിധി അയോഗ്യനായാലോ മരണപ്പെട്ടാലോ ആറ് മാസത്തിനകം ഉപതെരഞ്ഞെടുപ്പ് നടത്തണമെന്നാണ് ചട്ടം. സൂറത്ത് കോടതി വിധിക്കെതിരെ ഹൈക്കോടതിയേയോ സുപ്രിംകോടതിയോ സമീപിക്കാന്‍ കോണ്‍ഗ്രസ് പ്രമുഖ അഭിഭാഷകരുടെ പാനല്‍ തയ്യാറാക്കിയിട്ടുണ്ട്. മേല്‍ക്കോടതി സൂറത്ത് കോടതി വിധി സ്റ്റേ ചെയ്യുകയോ ഇളവ് നല്‍കുയോ ചെയ്യാത്ത സാഹചര്യമുണ്ടായാല്‍ ഉപതിരഞ്ഞെടുപ്പിനുള്ള ചര്‍ച്ചകളും പാര്‍ട്ടിയില്‍ നടക്കുന്നുണ്ട്.
